Posted by
“… എന്തൊരു ഉറക്കമാണ് അമ്മേ ഇത്. ഞാൻ എത്ര നേരായിട്ട് ഒരു ചായക്ക് വേണ്ടി വിളിക്കാണെന്നോ…” കട്ടിലിൽ കിടക്കുന്ന അമ്മയോട് സംസാരിച്ചുകൊണ്ട് ഞാൻ നേരെ ജനലിലെ കർട്ടൻ മാറ്റാൻ പോയി.
“…കേട്ടോ അമ്മേ പതിവില്ലാതെ ഇന്നലെ അച്ഛൻ എന്റെ സ്വപ്നത്തിൽ വന്നു. എന്നോട് ഒരുപാട് സംസാരിച്ചു പക്ഷെ എനിക്ക് ഒന്നും ഓർമ്മ ഇല്ല. ചിരിച്ചോണ്ട സംസാരിച്ചേ ചിലപ്പോ നമ്മൾ ഈ വീട് വെച്ചതിൽ സന്തോഷം പങ്കിടാൻ വന്നതാവും…” കർട്ടൻ എല്ലാം മാറ്റിയിട്ടും അമ്മ അനങ്ങാതെ കിടക്കുന്നത് കണ്ട് തേജസ് അമ്മയുടെ പക്കലേക്ക് പോയി.
“… ഇങ്ങനെ ഒരു മടിച്ചി പാറു. രാവിലെ എഴീക്കൻ ഒന്നും വയ്യ അല്ലെ. മാമന്റെ വീട്ടിൽ നിന്ന് മടിപിടിച്ചു പോയി…” തേജസ് വന്ന് അമ്മയെ കുലുക്കി വിളിച്ചിട്ട് അമ്മ ഉണർന്നില്ല.
“…അമ്മേ… അമ്മേ… അമ്മേ കളിക്കാതെ എഴുന്നേറ്റെ… അമ്മേ… ” തേജസിന്റെ ചിരി എല്ലാം പോയി. എത്ര തട്ടി വിളിച്ചിട്ടും അമ്മ എഴുനേൽക്കുന്നില്ല ഉള്ളിലാകെ ഒരു ഭയം ഇറച്ചു കയറാൻ തുടങ്ങി.
വിറയാർന്ന കൈകൾ കൊണ്ട് അമ്മയുടെ മൂക്കിലേക്ക് അടുപ്പിച്ചു. ഒരു ഞെട്ടലോടെ തേജസ് പിന്നിലേക്ക് ഞെട്ടി മാറി. അവന്റെ കൈ തട്ടി ടേബിളിൽ വച്ചിരുന്ന സ്റ്റീൽ ഗ്ലാസ് നിലത്തേക്ക് വീണ സൗണ്ട് ആ മുറി ആകെ പറന്നു.
വിറങ്ങലിച്ചു പോയ തേജസ് എന്ത് ചെയ്യാണം എന്ന് അറിയാതെ ആകെ പരവശനായി. ആ നിമിഷം മുന്നിൽ തെളിഞ്ഞുവന്നത് മാമന്റെ മുഖം ആയിരുന്നു.