Posted by
”രണ്ടോ മൂന്നോ…തോറ്റില്ലേ നീ….” അവൻ ആറടിച്ചു കൊണ്ട് അവളുടെ അവസാനത്തെ കരുവും വെട്ടി ഹോം ആയി. “യെസ്! ഞാൻ ജയിച്ചു! ഇനിയെങ്കിലും സമ്മതിക്ക് ഫൈസിക്കാക്ക പുലിയാണെന്ന്.” അവൻ അർമാദിക്കുന്നത് കണ്ട് ഐഷു കളി മതിയാക്കി ഫോണിലേക്ക് മുഖം താഴ്ത്തി.
“” തോറ്റു തോറ്റു തൊപ്പിയിട്ട് ഞാനാ പടച്ചോനോട് ഒന്ന് ജയിപ്പിക്കാൻ പ്രാർത്തിച്ചേ… എന്നിട്ടാണെങ്കിൽ ഒടുക്കത്തെ ജാടയും.. വല്ലാത്ത സാധനാ കാക്കു ങ്ങള്…. “”
അവളതും പറഞ്ഞുകൊണ്ട് മൊബൈലിൽ തോണ്ടി…അവളുടെ കുറുമ്പുള്ള മുഖം കണ്ട് അവനും ചിരി വന്നു…
അല്പം കഴിഞ്ഞ്, കൗതുകം സഹിക്കാതെ ഫൈസി അവളുടെ അടുത്തേക്ക് നീങ്ങിയിരുന്നു.
“ഇങ്ങു തന്നേ നിന്റെ ഫോൺ… നീ ആ നാൽപ്പത് വീഡിയോ അല്ലാതെ വേറെ എന്തൊക്കെയാണ് ഇതിൽ ഒളിപ്പിച്ചു വെച്ചിരിക്കുന്നത് എന്ന് എനിക്കൊന്നു കാണണം.”
പണ്ടത്തെപ്പോലെ അവൾ ഫോൺ തട്ടിപ്പറിച്ചില്ല. പകരം ഒരു വല്ലാത്ത ഭാവത്തിൽ അവൾ അത് അവന് നൽകി. ഫൈസി പതിയെ ക്രോം ഹിസ്റ്ററി എടുത്തു. അവളുടെ പഴയ സെർച്ച് ഹിസ്റ്ററികൾക്കിടയിൽ കഴിഞ്ഞ മൂന്ന് ദിവസത്തെ തിരച്ചിലുകൾ കണ്ടപ്പോൾ ഫൈസിയുടെ കണ്ണ് തങ്ങിപ്പോയി.
”കാക്കുവിന്റെ പിണക്കം മാറ്റാൻ എന്തുചെയ്യണം?”
“പിണങ്ങിയവരെ ഇണക്കാൻ 10 വഴികൾ”
“ഇഷ്ടപ്പെട്ട പുരുഷൻ മിണ്ടാതിരുന്നാൽ എന്ത് ചെയ്യും?”
“നമ്മളെ അവഗണിക്കുന്നവരോട് എങ്ങനെ സംസാരിക്കണം?”
ഫൈസിയുടെ ഉള്ളിൽ ഒരു വിങ്ങൽ അനുഭവപ്പെട്ടു. താൻ അകലം പാലിച്ചു നടന്നപ്പോൾ അവൾ എത്രമാത്രം വിഷമിച്ചിരുന്നുവെന്നും തന്നെ തിരികെ കിട്ടാൻ അവൾ ഗൂഗിളിൽ പോലും പരിഹാരം തിരഞ്ഞു നടക്കുകയായിരുന്നുവെന്നും കണ്ടപ്പോൾ അവന് അവളോട് അടക്കാനാവാത്ത വാത്സല്യം തോന്നി.