ദിവ്യാനുരാഗം 6 [Vadakkan Veettil Kochukunj]
” ഓ നിന്റെ തൊള്ളയിലേക്ക് ലിറ്റർ കണക്കെ ഞാൻ ഒഴിച്ചുതരാം… പക്ഷെ നാളെ പറഞ്ഞപോലെ കണ്ടുപിടിക്കണം… “
ഞാൻ അവനോട് ചിരിച്ചുകൊണ്ട് പറഞ്ഞു
” എന്നാ മോൻ പേടിക്കണ്ട… ആരെ കൊന്നിട്ട് ആണെങ്കിലും അവളെ കണ്ടെത്തിയിരിക്കും…ഇത് നന്ദുവിൻ്റെ വാക്കാ… “
അവൻ സ്വരമുയർത്തി എന്നോട് പറഞ്ഞു
” അത് കേട്ടാ മതി എന്നാ ശരി നാളെ പാക്കലാം… “
ഞാൻ അവനോട് ബൈ പറഞ്ഞു
” ഓ ശരി…ബൈ മോനെ.. “
അവനതും പറഞ്ഞു ഫോൺ കട്ടാക്കി…
പിന്നെ കുറച്ച് നേരം റൂമിൽ ഓരോന്ന് ആലോചിച്ചിരുന്ന് രാത്രി അച്ഛനും അമ്മയ്ക്കും ഒപ്പമിരുന്ന് ഭക്ഷണവും കഴിച്ച് നേരത്തേ കിടന്നുറങ്ങി… നാളെ പണി ഉള്ളതാണല്ലോ…
രാവിലെ അലാറം ഒക്കെ വച്ച് നേരത്തെ എഴുന്നേൽക്കാം എന്ന് കരുതിയ എന്നെ നിദ്രാ ദേവി തന്നെ ആദ്യം പറ്റിച്ചു… എഴുന്നേറ്റത് 9:30-ക്ക് അതും അമ്മ വിളിച്ചത് കൊണ്ട്… പുള്ളിക്കാരി ഹോസ്പിറ്റൽ പോകാൻ റെഡി ആവുകയായിരുന്നു…
” അമ്മേ ഈ അലറാം ആരാ ഓഫ് ചെയ്യ്തേ…? “
ഫോണിലെ അലാറം ഓഫ് ആയത് കണ്ട് എന്നെ വിളിച്ച് റൂമിൽ നിന്നും പോകാൻ നോക്കിയ അമ്മയോട് ഞാൻ ചോദിച്ചു…
” അത് ഞാനാ ഓഫ് ചെയ്തേ… അലാറം വച്ചാൽ അത് കേട്ട് എഴുന്നേൽക്കണം അല്ലാതെ ബാക്കിയുള്ളവരെ ശല്യം ചെയ്യാൻ ആകരുത്… “
എൻ്റെ ചോദ്യത്തിന് കടുപ്പത്തിൽ അമ്മ മറുപടി നൽകി
” ച്ഛേ…വൈകിയല്ലോ… “
ഞാൻ ആരോടെന്നില്ലാതെ പറഞ്ഞ് കിടക്കയിൽ നിന്നെഴുന്നേറ്റു
” എന്താണ് മോനെ വല്ല അടിപിടിക്കും കോളൊപ്പിച്ചിനോ ഇന്ന്…അതോ പുതിയ വല്ല പടവും റിലീസുണ്ടോ… “
പതിവിലും നേരത്തെ ഉള്ള എൻ്റെ തിടുക്കം കണ്ട് അമ്മ ചോദിച്ചു…
” ഇങ്ങളെന്താണ് ഡോക്ടറേ… പഠിക്കാൻ മുട്ടി നിക്കുന്ന മകനെ ഓരോന്ന് പറഞ്ഞ് ഇല്ലാണ്ടാക്കുന്നേ… “
കൈയ്യിലെ ബ്രഷിൽ പേസ്റ്റ് ആകുന്ന നേരം നോക്കി ഞാൻ അമ്മയോട് ചോദിച്ചു
” പഠിക്കാനാണെന്ന് മനസ്സിലായി പക്ഷെ പഠിക്കാൻ പോകുന്ന വിഷയം എന്താണെന്ന് കത്തിയില്ല… “