🏘️ബോസ്റ്റൻ ബംഗ്ലാവ് 5 [Gladiator]

“ങേ.. ആരാ അത്…?”ഡെയ്സി വീടിൻ്റെ വടക്കുപടിഞ്ഞാറേ മൂലയിലേക്ക് നോക്കി പറഞ്ഞു.

“ങേ.. എവിടെ…?”ഡാനിയേൽ ഡെയ്സി നോക്കിയ സൈഡിലേക്ക് നോക്കി.

ആ മൂലയിലായി ആറടി പൊക്കമുള്ള, തൊപ്പി ധരിച്ച പുരുഷൻ നിൽക്കുന്നു,അവൻ ധരിച്ചിരുന്ന വെൽവേറ്റ് ജാക്കറ്റ് താഴെ കാൽമുട്ട് വരെ നീണ്ടു കിടന്നു, കട്ടി മീശയും കുറ്റി താടിയും. കണ്ടാൽ തന്നെ പേടി തോന്നിപികുന്ന രൂപം. ഡാനിയേൽ അയാളുടെ കണ്ണുകളിലേക്ക് നോക്കി, ഇത്രയും കറുത്ത കൃഷ്ണമണികൾ ഇതുവരെ അവൻ കണ്ടിട്ടില്ല.

“എന്ത് ചേറ്റത്തരമാടാ നായിന്റമക്കളെ എന്റെ തോട്ടത്തിൽ കാണിക്കുന്നത്”മുഷ്ടി ചുരുട്ടി ആ പുരുഷ രൂപം അലറി. അവർ നിൽക്കുന്ന ഇടത്ത് നിന്നും 30 അടിയെങ്കിലും അകലെയാണ് അയാൾ നിന്നത്.

“അ.. ആരാ അത്..?” കടുത്ത ശബ്ദത്തിൽ ഡെയ്സി ചോദിച്ചു.

“കം…ലേറ്റ്സ് ഗോ…”പേടിച്ച സ്വരത്തിൽ ഡാനിയേൽ പറഞ്ഞു. ഡാനിയേൽ ആ പുരുഷ ശബ്ദം മനസിലാക്കിയിരുന്നു, അന്ന് രാത്രി കേട്ട അതേ ശബ്ദം.. അതേ ഇത് തന്നെയാണ് ഫെഡറിക്ക്…കത്രീനയുടെ ഭർത്താവ്…ഈ വീട് എന്താ പ്രേതങ്ങളുടെ തറവാടാണോ എന്നവൻ ആലോചിച്ചു.

ഫെഡറിക്ക് അപ്പോഴേക്കും അവരുടെ അടുത്തേക്ക് നടന്നു തുടങ്ങിയിരുന്നു.ഫെഡറിക്ക് അടുക്കുന്നത് കണ്ട ഡാനിയേൽ ഡെയ്സിയുടെ കൈകളിൽ പിടിച്ചു വലിച്ചു “വാ…ഓട്” അവൻ അലറി.ഡെയ്സിയും അവനും ഓടി.

“ഡാനി…എന്താ നടക്കുന്നത്..?” എന്തിനാടാ ഓടുന്നെ…ഇത് നമ്മുടെ വീടാ…” ഓട്ടത്തിനിടയിൽ അവൾ ചോദിച്ചു.

വന്ന വഴിയേ അവർ തിരികെ ഓടി.

“അവിടെ നില്ലെടാ കള്ളന്മാരെ…രണ്ടിനെയും ഞാൻ കൊല്ലും”ഫെഡറിക്കിന്റെ സ്വരം കോപം കൊണ്ട് വിറച്ചു..