🎪കൊച്ചിൻ കാർണിവൽ 5 [Harry Potter]

പണ്ട് വേണി പറഞ്ഞുള്ള അക്കാദമി നെയിം ഓർമയുണ്ട്. ഗൂഗിൾ മാപ്പിൽ അതും സെർച്ച്‌ ചെയ്ത് ഞാൻ അങ്ങോട്ടേക്ക് പോയി. അല്പം ബുദ്ധിമുട്ടി ആണെങ്കിലും സ്ഥലം ഞാൻ കണ്ടെത്തി. ഇപ്പോൾ തന്നെ രാത്രി 7 മണി കഴിഞ്ഞു, പക്ഷെ അക്കാദമിയിൽ ചെന്നപ്പോൾ അത്യാവശ്യം നല്ല തിരക്കുണ്ടായിരുന്നു. അധികവും കൊച്ചു പയ്യന്മാർ ആണ്. മിക്കതും 15 വയസ്സിൽ താഴെ. പെൺകുട്ടികളും ഉണ്ട്.

“ന്യൂ അഡ്മിഷൻ ആണോ…”എന്നെ കണ്ടതും ഓഫീസിൽ ഇരുന്ന പെൺകുട്ടി ചോദിച്ചു.

“ഏയ്. അല്ല. ഞാൻ കൃഷ്ണവേണിയെ കാണാൻ വന്നതാണ്…

“അഹ്.. ഓക്കേ. നേരെ പോയാൽ മതി. പ്രാക്ടീസ് നടക്കുകയാണ്.

“ഓക്കേ. താങ്ക്യൂ.

 

ആ പെൺകുട്ടി പറഞ്ഞത് പോലെ നേരെ നടന്നു ഞാൻ വലിയൊരു ഹാളിൽ എത്തി. 3 ബോക്സിഗ് റിങ് അവിടെയുണ്ടായിരുന്നു. മാത്രമല്ല പ്രാക്ടീസ് ചെയ്യാൻ കുറെ ബോക്സിങ് ബാഗ് ഒക്കെ സെറ്റ് ചെയ്തിട്ടുണ്ട്. പലതിലും പിള്ളേർ വർക്ക്‌ ചെയ്യുകയാണ്. അവിടെയുള്ള ഒരു റിങ്ങിൽ വേണി പ്രാക്ടീസ് ചെയുന്നത് ഞാൻ കണ്ടു.

കോച്ച് കയ്യിൽ രണ്ട് പാട് കെട്ടി നിൽപ്പുണ്ട്, അയാളുടെ നിർദ്ദേശ പ്രകാരം വേണി ബോക്സിങ് ഗ്ലൗസ് ഇട്ട കൈ കൊണ്ട് ആ പാടിൽ പഞ്ച് ചെയ്യുകയാണ്.ഇടയ്ക്ക് കാലുകൊണ്ട് കിക്കും ചെയുന്നുണ്ട്.അങ്ങോട്ട് ചെന്ന് ഇപ്പോൾ സംസാരിക്കുന്നത് ശരി അല്ല, അവൾ പ്രാക്ടീസ് കഴിഞ്ഞു ഇറങ്ങട്ടെ എന്ന് ഞാൻ കരുതി.

 

 

 

ഞാൻ തിരിഞ്ഞു നടന്നു അക്കാദമിയുടെ ഓഫീസിനു പുറത്ത് ചെന്നിരുന്നു. സമയം ഇഴഞ്ഞു നീങ്ങിക്കൊണ്ടിരുന്നു. അരമണിക്കൂറിൽക്കൂടുതൽ ഞാനവിടെ ഇരുന്നു.

“ഹേയ്.. അഭി.. നീയെന്താ ഇവിടെ….?”

ശബ്ദം കേട്ട ഭാഗത്തേക്ക്‌ ഞാൻ നോക്കി. വിയർത്തൊലിച്ചു, ഒരു ഷോർട്സും ടി ഷർട്ടും ഇട്ട് വേണി എന്റെ മുന്നിൽ നിൽക്കുന്നു. എന്നെ അവിടെ കണ്ടതിന്റെ ഞെട്ടൽ അവളുടെ മുഖത്ത് വ്യക്തമായിരുന്നു.

ഞാൻ :-ഹായ്..

വേണി :-ഹായ്.. നീ.. നീ ഇവിടെ…?

ഞാൻ :-ഇതിലെ പോയതാ.. അപ്പോൾ തന്നെ ഒന്ന് കേറി കാണമെന്ന് കരുതി.

“താൻ വന്നിട്ട് കുറേ നേരം ആയോ.

“അഹ്. കുറച്ചായി.