“അളിയാ നീയോ….. അടിപൊളി ”
“നീ നാട്ടിൽ ഉണ്ടായിരുന്നോ “…ഞാൻ ചോദിച്ചു
“ഒരു മൂന്ന് ദിവസമായി ഉണ്ട്, ചില അത്യാവശ്യങ്ങൾ ഉണ്ടായിരുന്നു.. നീ എപ്പോ എത്തിയതാ “..
“ഞാനും അങ്ങനെ ഒക്കെ തന്നെ.. കുറച്ചായി വന്നിട്ട്,അതുകൊണ്ട് ഒരാഴ്ച നിന്നു “..
” ആ മറന്നു… എടാ ഇതാണ് അനുപമ എന്റെ ശ്രീമതി “..
” ഹലോ അനുപമ, ഞാൻ ശരത് .. കല്യാണത്തിന് കണ്ടതാണ് “..
“ഹൈ…എനിക്കറിയാം അശ്വിൻ പറയാറുണ്ട്.. ” അവൾ പറഞ്ഞു
ഞാനും അനുപമയുമായുള്ള ആ സംഭാഷണം അവിടെ തീർന്നു.. ആ സമയത്ത് അല്ലെങ്കിലും എനിക്ക് സംസാരിക്കാൻ ഉണ്ടായിരുന്നത് അശ്വിനോടായിരുന്നു.. അല്ലേലും മനുഷ്യൻ നല്ലവനായിരിക്കുമ്പോൾ മറ്റെന്തിനെക്കാളും സൗഹൃദങ്ങളും സുഹൃത്തുക്കളും ആണല്ലോ വലുത്..
ഏറ്റവും അടുത്ത രണ്ടു സുഹൃത്തുക്കളുടെ കുറെ നാളുകൾക്കു ശേഷം ഉള്ള കണ്ടു മുട്ടലിൽ സാധാരണ സംഭവിക്കുന്ന പോലെ തന്നെ ആയിരുന്നു അവിടെയും.. പഴയ കഥകളും കാര്യങ്ങളും ഭാര്യയുടെ മുന്നിൽ പറയാവുന്നത് എന്ന് രണ്ടാൾക്കും നല്ല ബോധമുള്ള എല്ലാം ഞങ്ങൾ അനുപമയോട് കൂടെ എന്ന വണ്ണം പങ്കുവച്ചു കൊണ്ടേ ഇരുന്നു.. വളരെ പരിചയം ഉള്ള ആളോട് എന്ന പോലെ അവളും എന്നോടും സംവദിച്ചു കൊണ്ടിരുന്നു.. അന്യരായുള്ള യാത്രക്കാരുടെ ആഭാവവും ഞങ്ങൾക്ക് അനുകൂല ഘടകം ആയി ഭവിച്ചു..
ഇതിനിടയിൽ ടിട്ടി വന്നു പോയി.. ഞാനും അവരും ഭക്ഷണം കൊണ്ട് വന്നിരുന്നത് എല്ലാരും ഒരുമിച്ചിരുന്നു കഴിച്ചു.. എനിക്കും അവനും ഇതൊക്കെ ഒരു ഹോസ്റ്റൽ ലൈഫ്ന്റെ റീ ക്രീയേഷൻ ആയിരുന്നു എങ്കിൽ അനുപമ അപരിചിതയായി നിൽക്കാതെ ഞങ്ങളോടൊപ്പം ചേർന്നത് ആ സമയത്തിന്റെ സുഖo വർധിപ്പിച്ചു…
കുറെ നേരം പിന്നെയും പോയി..അപ്പോഴേക്കും ട്രെയിൻ കോയമ്പത്തൂർ കഴിഞ്ഞിരുന്നു…. അനുപമ കിടന്നിട്ട് കഴിഞ്ഞിട്ട് ഒന്നു പുകയ്ക്കാൻ പറ്റുമോ എന്ന് നോക്കാം എന്ന് ഞങ്ങൾ പ്ലാൻ ചെയ്തു.. അവൾക്ക് ആ ശീലത്തെ പറ്റി അറിയാമെങ്കിലും..
അങ്ങനെ അവൾക്കുള്ള ബെർത്ത് റെഡി ആക്കി അവൾ ഉറങ്ങിയിട്ട് ഞങ്ങൾ രണ്ടുമൂന്നു റോ മാറി ഇരുന്ന് ഓരോന്ന് പുകയ്ക്കാൻ തുടങ്ങി, ഞാൻ കൂടെ കരുതിയിരുന്ന വോഡ്കയും എടുത്തു .. കമ്പാർട്മെന്റ് കാലി ആയിരുന്നു എന്നത് കൊണ്ട് എല്ലാത്തിനും നല്ല സൗകര്യം ആയിരുന്നു. പോരാത്തതിന് നല്ല ഇരുട്ടും ..