Posted by “അങ്കിലിനു തോനെ പൈശ തരാൻ പൊന്നു ചാച്ചനോട് പഞിണ്ട്..”
മുൻപ് മൂർത്തി അണ്ണൻ പറഞ്ഞ കാര്യം ഓർത്തു പൊന്നൂസ് പറഞ്ഞൊപ്പിച്ചു..തപ്പിത്തടഞ്ഞുകൊണ്ടാണ് അവള് വലിയ വാചകങ്ങൾ പറയുന്നത് ..
മുൻപ് വന്നപ്പോൾ ഓഫീസിൽ നിന്നും ശമ്പളം ഒന്നും കിട്ടുന്നില്ല എന്നൊക്കെ മൂർത്തി അണ്ണൻ പൊന്നൂസിനോട് പറഞ്ഞിരുന്നു . അവളെ പറ്റിക്കാൻ വേണ്ടി പറഞ്ഞതാണ് . ശമ്പളം ഒകെ കുറവാണു, അച്ഛനോട് പറഞ്ഞിട്ട് മൂർത്തി അങ്കിളിനു കൊറേ പൈസ തരാൻ പറ എന്നൊക്കെ പുള്ളി അറിയുന്ന മലയാളത്തിൽ മോളോട് തട്ടിവിട്ടിരുന്നു .
“അപ്പിടിയാ ..ശരി ശരി …”
പുള്ളി അതുകേട്ടു ചിരിച്ചു .
“ആ ..അപ്പിടി …”
അവളും അതുപോലെ പറഞ്ഞു തലയാട്ടി . അതൊക്കെ കേട്ട് ഓരോ ഓപ്പൺ ക്യാബിനിലായി ഇരിക്കുന്നവർ ചിരിക്കുന്നുണ്ട്.
ഞാൻ മൂർത്തി അണ്ണനെ വിഷ് ചെയ്തു റോസ്‌മോളെയും കൂട്ടി എന്റെ കാബിനിലേക്ക് കയറി .
പിന്നെ സീറ്റിലേക്ക് ചെന്നിരുന്നു . റോസ്‌മോളും എന്റെ അടുത്തായി മറ്റൊരു കസേരയിൽ ഇരുന്നു . അവളുടെ കാലുകൾ ഒന്നും അതിൽ ഇരുന്നാൽ നിലത്തേക്കെത്തില്ല..അതുകൊണ്ട് കസേരയിൽ ചാരി കിടക്കുകയാണ് എന്ന് പറയാം .
“അതേയ്… മിണ്ടാണ്ടിരുന്നോണം കേട്ടല്ലോ …”
സീറ്റിലിരുന്നു മുന്പിലിരുന്ന ലാപ് ഓൺ ചെയ്തുകൊണ്ട് ഞാൻ റോസ്‌മോളെ നോക്കി .
“ഹ്മ്മ് …”
അതിനു അവള് പയ്യെ തലയാട്ടി . അതൊക്കെ ചുമ്മാ എന്നെ ബോധിപ്പിക്കാൻ വേണ്ടിയാണു എന്ന് അവൾക്കും എനിക്കുമൊക്കെ നന്നായിട്ട് അറിയാം ..
ലാപ് ഉണക്കിയ ശേഷം ഞാൻ ഓഫീസ് റൂമിലെ എ.സി ഓൺ ചെയ്തു തണുപ്പ് സ്വല്പം കുറച്ചിട്ടു . പെണ്ണിന് അധികം തണുപ്പ് പറ്റില്ല. വേഗം ജലദോഷം പിടിക്കും .അങ്ങനെ ഇരിക്കെ ജഗത് ക്യാബിനിലേക്ക് കേറിവന്നു .ഫോര്മാലിറ്റിയുടെ ആവശ്യം ഒന്നും ഞങ്ങൾക്കിടയിൽ ഇല്ലാത്തോണ്ട് കക്ഷി നേരെ വാതിൽ തുറന്നു കേറി .
“ഹായ് പൊന്നു …”
എന്റെ അടുത്തിരിക്കുന്ന റോസ്‌മോളെ വിഷ് ചെയ്തു ചിരിച്ചുകൊണ്ടാണ് ജഗത് അകത്തേക്ക് കേറിയത് .
“ഹായ് മാമ ….”
അവള് തിരിച്ചും കൈവീശികൊണ്ട് ചിരിച്ചു .
“സുഖം അല്ലേ ? ”
പുള്ളി വീണ്ടും തിരക്കിക്കൊണ്ട് ഞങ്ങൾക്ക് മുൻപിൽ കിടന്ന കസേരകളിലൊന്നിൽ ഇരുന്നു .
“ശുകം ആഹ് ..”
അതിനു അവള് കൊഞ്ചലോടെ മറുപടി പറഞ്ഞു അടുത്തിരുന്ന എന്നെ ഒളികണ്ണിട്ട് നോക്കി .ഞാൻ അത് മൈൻഡ് ആക്കാതെ ജഗത്തിനോടായി സംസാരം തുടങ്ങി .
അപ്പോഴേക്കും റോസിമോള് കസേരയിൽ നിന്നും നിരങ്ങി താഴേക്കിറങ്ങാൻ ശ്രമം തുടങ്ങിയിരുന്നു . ഒരുവിധം അവള് ചാടി ഇറങ്ങി.
“ഡീ അവിടെ ഇരി …”
അവള് താഴെ ഇറങ്ങിയതും ഞാൻ കണ്ണുരുട്ടി.
“ഇല്യ ..നാൻ പോവാ …”