🔥ഏദൻ തോട്ടത്തിന്റെ കാവൽക്കാരൻ 13🔥[സഞ്ജു സേന]

”അതെ ,അവരുടെ ഒരു ബോട്ടിൽ കയറ്റി വിടാമെന്നാണ് പറയുന്നത് ”

”ഈശ്വര ,സീ ബേർഡ്‌സ് ……”

”സീ ബേർഡ്‌സ് ?”

”അതെ ,അതാണാ ബോട്ടിന്റെ പേര് ,ആറു പേരുണ്ടതിൽ ,അരുൺ തോമസിന്റെ തീറ്റിപ്പോറ്റുന്ന ചെകുത്താന്മാർ ….നരക ശിക്ഷയേക്കാൾ കഠിനമാണ് അവരുടെ കയ്യിൽ അകപ്പെടുന്ന പെണ്ണ് അനുഭവിക്കേണ്ടി വരിക ..വേണ്ട അർജുൻ ,അത് വേണ്ട ,ശത്രുവാണവൾ എങ്കിലും വേണ്ട ..”

”പിന്നെ …?”

”ഞാൻ ദേവമ്മയ്ക്ക് കൊടുക്കാം …ഒരു മിനിറ്റ് ”

ഒരു മിനിട്ടിനു ഇത്രയും ദൈർഘ്യമോ എന്ന് തോന്നി പോയി ,എല്ലാവരും എന്നെ തന്നെയാണ് നോക്കി നിൽക്കുന്നത് ,,

”അർജുൻ …ന്റെ കുട്ടി കുഴപ്പങ്ങളിൽ നിന്ന് കുഴപ്പങ്ങളിലേക്കാണല്ലേ പോകുന്നത് ”

”ദേവമ്മ അത് വേറെ വഴിയില്ലായിരുന്നു ….”

”സാരമില്ല ,ഒരു പത്തു കിലോമീറ്റെർ പോയാൽ കമ്പനിപ്പടി എന്നൊരു സ്ഥലമുണ്ട് ,അവിടെയുള്ള പഴയ ഇഷ്ടിക കമ്പനിയുടെ പിറകിലുള്ള ലക്ഷം വീട് കോളനിയിലെ മൂന്നാമത്തെ വീട്ടിലാണ് ഷൈനിയുടെ അമ്മയും ചേച്ചിയും അവരുടെ രണ്ടു കുട്ടികളുമുള്ളതു ,കാര്യങ്ങൾ ശരിയാകുന്നത് വരെ അവർക്ക് നമ്മുടെ കയ്യിലുള്ള ഒരു താമസസ്ഥലം ഏർപ്പാടാക്കി കൊടുക്ക് ..”

”എനിക്ക് മനസ്സിലായില്ല ..”

”സോറി അർജുൻ ,ഞാനെന്തൊരു മണ്ടിയാണ് , നീ ഫോൺ മനോജിന് കൊടുക്ക് ഇത്തരം കാര്യങ്ങൾ അവനു പെട്ടെന്ന് മനസ്സിലാകും ..”

ഞാൻ ഫോൺ മനോജിന് കൈമാറി ,ദേവമ്മ എന്താണ് പറഞ്ഞതെന്നറിയില്ല എങ്കിലും അവർ പറഞ്ഞതെല്ലാം അയാൾ സമ്മതിച്ചു തലകുലുക്കുന്നതു കണ്ടു ..ഏതായാലും ആ ചെകുത്താന്മാർക്ക് കൈമാറേണ്ടി വരില്ല ,അതൊരാശ്വാസം ..

”ഇവരെ നിങ്ങളുടെ കാറിലേക്ക് മാറ്റി കൊള്ളൂ ,എന്നിട്ടു സുരക്ഷിതമായി ഇവിടെ അടുത്തുള്ള ഏതെങ്കിലും സ്ഥലത്തു കാത്തു നിൽക്കുക ,കൃത്യം ഒരു മണിക്കൂറിനകം ഞാൻ വിളിക്കും ,..”

ഫോൺ തിരിച്ചു തന്നു അയാൾ ആംബുലൻസിലേക്ക് കയറി ,ഞങ്ങൾ വേഗം ഷൈനിയെ സ്‌ട്രെച്ചറിൽ നിന്ന് ലോക്ക് ചെയ്തിരുന്ന ബെൽറ്റുകൾ മാറ്റി പുറത്തേക്കിറക്കി ആകാശ് അപ്പോഴേക്കും ഫിഗോ ഞങ്ങളുടെ അടുത്തേക്ക് അടുപ്പിച്ചു നിർത്തിയിരുന്നു ,ഡോർ തുറന്നു അവരെ പൊക്കിയെടുത്തു കാറിന്റെ പിൻസീറ്റിലേക്ക് തള്ളി ..ഇനി കാത്തു നിൽക്കാൻ പറ്റിയ സുരക്ഷിതമായൊരു സ്ഥലം കണ്ടു പിടിക്കണം .നേരത്തെ പോയ ടി സ്റ്റാളിന്റെ പരിസരത്തു കുറച്ചു മരങ്ങൾ നിരന്നു നിൽക്കുന്നുണ്ട് ,ചായ കുടിക്കാനെന്ന രീതിയിൽ അവയ്ക്കിടയിൽ പാർക്ക് ചെയ്താൽ ആരുമങ്ങനെ ശ്രദ്ധിക്കില്ല .നേരെ അങ്ങോട്ട് തന്നെ വിട്ടു ..

”അർജുൻ ,അവർക്ക് ?”

സമീറയുടെ ചോദ്യം കേട്ട് ആ അവസരത്തിലും എനിക്ക് ചിരിയാണ് വന്നത് , ഇത് പോലൊരു പാവം പെണ്ണ് ..

”ഉം ,കൊടുത്തേക്ക് ,ആകാശ് നീ കൂടെ ചെല്ല് എന്നിട്ടു പ്രിയയോട് വന്നു ചായ കുടിക്കാൻ പറയു ..ചേട്ടാ രണ്ടു സ്ട്രോങ്ങ് ചായ കൂടി ”

മൂന്നു സ്ത്രീകളുള്ളതല്ലേ , ഇരുട്ടത്ത് നിർത്തി ആളുകൾക്ക് സംശയമുണ്ടാക്കുന്നതിലും നല്ലതു ടി സ്റ്റാളിന് അടുത്ത് നിർത്തുന്നതാണെന്നു പറഞ്ഞത് പ്രിയയാണ് ,അത് കൊണ്ട് കടയുടെ അടുത്ത് തന്നെ പാർക്ക് ചെയ്തു പ്രിയയെ ഷൈനിക്കൊപ്പം ഇരുത്തി ഞങ്ങൾ മൂന്നു പേരും ചായ കുടിയ്ക്കാനായി പുറത്തേക്കിറങ്ങിയതാണ് ..ഒരു ധൈര്യത്തിന് സമീറയുടെ തലയിൽ കിടന്ന തട്ടമെടുത്തു കൈകൾ രണ്ടും കെട്ടിയിട്ടിട്ടാണ് വന്നത് . രക്ഷപ്പെടാൻ ശ്രമിച്ചാൽ പ്രിയക്ക് കൈകാര്യം ചെയ്യാവുന്നതേയുള്ളൂ ,എങ്കിലും റിസ്ക് വേണ്ട ..