എന്തിഷ്ടമായിരുന്നു അവളെ….തന്റെ പ്രാണന്റെ പാതി……പ്രീഡിഗ്രി കാലത്തെ റാഗിങ്ങിനു ഇടയിൽ കണ്ട കുസൃതി നിറഞ്ഞ ആ കണ്ണുകളോടു തോന്നിയ ആരാധന പ്രണയത്തിലേക്ക് വഴിമാറിയതെപ്പോഴാണെന്നു അറിയില്ല.. നോക്കി നോക്കി ഒടുവിലിങ്ങോട്ടും ഗ്രീൻ സിഗ്നൽ കിട്ടിയെന്നു അറിയവായപ്പോ മുതൽ ഭൂമിയിലേ ആയിരുന്നില്ലെന്ന് പറയാം…..
പ്രണയിച്ചും കലഹിച്ചും 1 വർഷം കഴിഞ്ഞുപോയത് അറിഞ്ഞില്ല….
ഒടുവിലൊരു രാത്രിയിലെ ” നമുക്ക് പിരിയാം…..ഇത് ശെരിയാവില്ല” എന്നൊരു
മെസ്സേജ് മാത്രം ഇട്ടുകൊണ്ട് ഒരു സ്വപ്നമെന്ന പോലെ അതവസാനിച്ചു…. കാര്യം എന്തെന്ന് പോലും മനസിലാവാതിരുന്ന എനിക്ക് ഒടുവിൽ ഒരു സുഹൃത്ത് വഴിയാണ് അവൾ എന്തായിരുന്നു എന്ന് ഞാൻ അറിഞ്ഞത്….എണ്ണമില്ലാത്ത അവളുടെ പ്രണയത്തിന്റെയും വഴിവിട്ട ബന്ധത്തിന്റെയും കണക്കുകളായിരുന്നു അവൻ എനിക്ക് മുന്നിൽ നിരത്തിയത്….കൂട്ടുകാർ ഒക്കെയും അവൾക്കിട്ട് പണിയാൻ പറഞ്ഞപ്പോഴും മറുപടി ആയിട്ട്
“അവൾ സന്തോഷമായി ഇരിക്കട്ടെ”
എന്നു മാത്രമാണ്….അതങ്ങനെ ആകട്ടെ എന്നുമാത്രമായിരുന്നു താൻ പ്രാർത്ഥിച്ചതും….അവളെ അത്രയേറെ ഇഷ്ടമായിരുന്നതുകൊണ്ടായിരുന്നു അത്.. ഇന്ന് വരെ വെറുത്തിട്ടുമില്ല ശപിച്ചിട്ടുമില്ല…
പിന്നെ അവൾ കല്യാണം അറിയിച്ചപ്പോൾ പോകാതിരിക്കാൻ തീരുമാനിച്ചു….അത് കാണാൻ ഉള്ള ശക്തി ഒന്നും ഇല്ല…വർഷം 3 4 കടന്നു പോയെങ്കിലും ആ ഇഷ്ടവും അവളുടെ സ്ഥാനവും മറ്റാർക്കും ഞാൻ കൊടുത്തിട്ടില്ല…..എന്നെ വളരെ വെടിപ്പായി അവൾ തേച്ചെങ്കിലും അവളോട് എന്തുകൊണ്ട് വെറുപ്പോ ഇഷ്ടക്കുറവോ തോന്നുന്നില്ല എന്ന് ഞാൻ തന്നെ ആലോചിച്ചു ഇരുന്നിട്ടുണ്ട്….
പിന്നെന്തിനു പോയി എന്നു നിങ്ങൾ ചിന്തിച്ചുകാണും…..അതിന് കാരണം അവളാണ് ആജൽ….
പേരിനൊരു ഹിന്ദി ടച്ച് ഉണ്ടെങ്കിലും തനി മലയാളി ആണ് കക്ഷി….
ആജൽ ശെരിക്കും എന്റെ സീനിയർ ആണ്…എന്നെക്കാൾ ഒരു 3 വയസിനു മൂത്തതാണ് കക്ഷി… എൽ കെ ജി വർഷവും +2 കഴിഞ്ഞ് വെറുതെ വീട്ടിൽ നിന്ന് ഒരു വർഷവും കളഞ്ഞു കുളിച്ചു ഒടുവിൽ ഡിഗ്രിയും പൂർത്തിയാക്കി ആണ് ഇങ്ങോട്ട് വന്നത്…. ഇപ്പൊ ഇവിടെ
എം എ മൂന്നാം വർഷം പഠിക്കുന്നു….
ശെരിക്കും എന്നെ നിയന്ത്രിക്കാൻ പറ്റുന്ന ഒരേ ഒരാൾ… എന്റെ അമ്മ പോലും അവൾക്ക് മുന്നിൽ തോൽക്കും എന്റെ കാര്യത്തിൽ….
പിന്നെ ഈ സീനിയർ കക്ഷി എങ്ങനെ എന്റെ ലൈഫിൽ വന്നു പെട്ടു എന്നു ചോദിച്ചാൽ അതിന് കാരണം കോളേജ് ഡേ ആണ്…