ചെറു മേടുകളും, സ്വർണ്ണ പുൽകൊടികളും, കിളിർത്തു നിൽക്കുന്ന പുൽതകിടികളും, കൊച്ചു കുളവും ഉള്ള സമാന്തര പ്രദേശങ്ങളെയും പുതച്ചു മൂടിയ വലിയ മേഘങ്ങളെയും മന്ദമാരുതൻ അനാച്ഛാദനം ചെയ്തു…
ഇടതൂർന്നു തഴച്ചു വളർന്ന വനാന്തരങ്ങളിലും, പുൽമേട്ടിലും, മൊട്ടകുന്നുകളിലും താഴ്വാരങ്ങളിലും കാറ്റ് വീശിയടിച്ചപ്പോൾ, ആരും കടന്ന് ചെല്ലാത്ത ഇരുളടഞ്ഞ വനാന്തരങ്ങളുടെ ഉൾപ്രദേശങ്ങളിൽ നിന്നും കൊച്ചരുവി പിറവി കൊണ്ടു,
അധികം താമസിയാതെ അത് സജീവമായി ഒഴുകി തുടങ്ങി.
വനാന്തരങ്ങളെ ഭദ്രമായി പുതപ്പിച്ച, നിറമുള്ള കൊച്ചു മേഘത്തെ ഈറനണിയിക്കാൻ കഴിവുള്ള കാറ്റേ… ആ കൊച്ചു മേഘത്തെ നിഷ്ക്കരുണം ഭേദിച്ചു ഭ്രംശം ചെയ്തു നീ..
അവിടങ്ങളിൽ, കാറ്റ് ശക്തമായി വീശിയടിച്ചപ്പോൾ, കൊച്ചുറവകൾ കാട്ടരുവികളിൽ ചേർന്നൊഴുകി.
കാട്ടാറിൽ കുത്തൊഴുക്ക് ശക്തിപ്രാപിച്ചു.. തെളിനീരുറവ മന്ദം മന്ദം പ്രവഹിച്ചു..
ഉഴവന്, കന്നി മണ്ണ് ഉഴുതു മറിക്കാൻ ആവശ്യവും അതു തന്നെയായിരുന്നു….
വനാന്തരങ്ങൾക്ക് നടുവിലെ കൃഷി ഭൂമിയിൽ, ആ ശക്തനായ കലപ്പയേന്തിയ കർഷകൻ പ്രത്യക്ഷനായി.
കർഷകൻ അറിയുന്നുണ്ടോ, കന്നിമണ്ണിന്റെ നോവ്. കർഷകന്റെ ഇഷ്ടങ്ങളെ എതിർക്കാൻ മാത്രം കെൽപ്പില്ലാത്ത, ഭൂമിയും കന്നിമണ്ണും പിന്നീട് വേദനകൾ കടിച്ചമർത്തി.
ഉഴുതു മറിക്കും തോറും മണ്ണിന്റെ വേദന അവിടെ അലിഞ്ഞലിഞ്ഞ് ഇല്ലാതായി…