Posted by ആ നിമിഷം, എന്റെ ഉള്ളിൽ എവിടെ നിന്നോ ഒരു ഉൾപ്രേരണ ഉണ്ടായി. ആരോ എന്റെ ചെവിയിൽ മന്ത്രിക്കുന്നത് പോലെ…
ചിന്തിക്കാൻ സമയമില്ലായിരുന്നു. ഞാൻ കുനിഞ്ഞ്, വിറയ്ക്കുന്ന ആമിയുടെ മുഖം കൈകളിൽ കോരിയെടുത്തു.
ശേഷം ഒട്ടും വൈകാതെ, ഞാൻ എന്റെ ചുണ്ടുകൾ അവളുടെ ചുണ്ടുകളോട് ചേർത്തു അമർത്തി ചുംബിച്ചു.
അതേ സമയം തന്നെ, എന്റെ വലംകൈ അവളുടെ വിരലിലെ ആ മോതിരത്തിൽ മുറുകെ പിടിച്ചു.
“ആാാാാാ….!!!!”
എന്റെ തൊണ്ടയിൽ നിന്നും ഒരു നിലവിളി പുറത്തേക്ക് വരാൻ വെമ്പിയെങ്കിലും, ആമിയുടെ ചുണ്ടുകൾ അതിനെ തടഞ്ഞുനിർത്തി.
എന്റെ ശരീരം മുഴുവൻ ലാവ കോരിയൊഴിച്ചതുപോലെ ചുട്ടുപൊള്ളാൻ തുടങ്ങി. ആരോ എന്റെ തൊലി ഉരിയുന്നത് പോലത്തെ വേദന. എന്റെ സിരകളിലൂടെ തീ ഒഴുകുന്നതുപോലെ… ശരീരം കീറിമുറിക്കുന്ന വേദനയിൽ ഞാൻ പിടഞ്ഞു.
എന്റെ ഈ അവസ്ഥ കണ്ട് നിധിയും കൃതികയും ഭയന്നുപോയി.
“ദേവാ… വേണ്ട… വിട്…”
അവർ എന്നെ ആമിയിൽ നിന്നും ബലമായി പിടിച്ചുമാറ്റാൻ ശ്രമിച്ചു.
ഞാൻ സർവ്വശക്തിയുമെടുത്ത് അവരെ തട്ടിമാറ്റി. വേദനകൊണ്ട് എന്റെ കണ്ണുകൾ നിറഞ്ഞൊഴുകുന്നുണ്ടായിരുന്നു. പക്ഷേ ഞാൻ പിടി വിട്ടില്ല.
ഞാൻ ആമിയുടെ ചുണ്ടുകളിലേക്ക് എന്റെ ജീവൻ പകർന്നുകൊടുത്തു കൊണ്ട്, ആ മോതിരം അവളുടെ വിരലിൽ നിന്നും ശക്തിയായി വലിച്ചൂരി.
അതൊരു സാധാരണ മോതിരമായിരുന്നില്ല, അവളുടെ മാംസത്തോട് ഒട്ടിപ്പിടിച്ച ഒന്നായിരുന്നു.
അവസാനം, വലിയൊരു ബലപ്രയോഗത്തിനൊടുവിൽ ആ മോതിരം ഊരിപ്പോന്നു.
ആ നിമിഷം, എന്റെ ഉള്ളിലൂടെ ഒരു വലിയ മിന്നൽപിണർ കടന്നുപോയി.