Posted by പാക്കിംഗ് എല്ലാം കഴിഞ്ഞ് ക്ഷീണിച്ച് ഞങ്ങൾ രണ്ടും കിടന്നു. നല്ല ക്ഷീണം ഉണ്ടെങ്കിലും ഉറക്കം വരുന്നില്ല. എന്റെ നെഞ്ചിൽ തലവെച്ച് കിടക്കുന്ന അവളുടെ ശ്വാസഗതി പതിവുപോലെയല്ല എന്ന് എനിക്ക് തോന്നി. നെഞ്ചിൽ ടീഷർട്ട് നനഞ്ഞ് തണുത്തു, അവളുടെ കണ്ണുനീരാണെന്ന് എനിക്ക് മനസ്സിലായി. ഞാനവളെ കുലുക്കി വിളിച്ചു.
ഡീ, കരയാതെ പെണ്ണെ…
അവൾ പെട്ടെന്ന് കണ്ണ് തുടച്ചു.
എനിക്ക് ഉറക്കം വരുന്നില്ല ജോക്കുട്ടാ നീ കിടന്നോ.
അവൾ എഴുന്നേൽക്കാൻ തുടങ്ങി.
നീ എവിടെ പോവാ? നിനക്ക് കരയണമെങ്കിൽ ഇവിടെ കരഞ്ഞാൽ മതി. അല്ലാതെ മാറിയിരുന്ന് കരയേണ്ട. ഞാനവളെ വിടാതെ മുറുക്കി കെട്ടിപ്പിടിച്ചുകൊണ്ട് പറഞ്ഞു.
അവൾ എന്റെ നെഞ്ചിലേക്ക് മുഖം പൂഴ്ത്തി ഏങ്ങലടിച്ചു. ഞാനവളുടെ തലയിൽ മെല്ലെ തലോടി. എന്റെ കണ്ണ് നിറഞ്ഞ് വന്നു.
ഞങ്ങൾ ഒന്നും മിണ്ടാതെ അങ്ങനെ തന്നെ കിടന്നു. എപ്പോഴാണ് ഉറങ്ങിപ്പോയത് എന്നറിയില്ല.
രാവിലെ അലാറം അടിക്കുന്ന കേട്ടാണ് എഴുന്നേൽക്കുന്നത്.
ഡീ, ഞാൻ വണ്ടി വരുന്നതിനു മുന്നേ കുളിച്ചിട്ട് വരാം. ഞാൻ എഴുന്നേറ്റ് ലൈറ്റ് ഇട്ട്കൊണ്ട് പറഞ്ഞു. നിനക്ക് കിടക്കണേൽ കിടന്നോ? ഞാൻ ലൈറ്റ് ഓഫ് ചെയ്തേക്കാം.
വേണ്ട, ലൈറ്റ് ഓഫ് ചെയ്യേണ്ട. അവൾ പറഞ്ഞു.
ഞാൻ കുളിക്കാനായി തോർത്തെടുത്ത് ടീഷർട്ട് ഊരി.
അതിങ്ങുതാ…
ഊരിയ ടീഷർട്ട് ചൂണ്ടി അവൾ പറഞ്ഞു.
ഞാനത് അവൾക്ക് കൊടുത്തു.
ഇന്നലെ പണിയെടുത്ത് വിയർത്തതും, അവൾ കരഞ്ഞതും, മൂക്കൊലിച്ചതും എല്ലാംകൂടെ അത് ആകപ്പാടെ മുഷിഞ്ഞിരുന്നു.
ഞാൻ ഫോൺ എടുത്ത് അവളുടെ കയ്യിൽ കൊടുത്തിട്ട് പറഞ്ഞു.
വണ്ടിക്കാരൻ വിളിച്ചാൽ എടുക്ക് കേട്ടോ, ഞാൻ കുളിച്ചിട്ട് പെട്ടെന്ന് ഇറങ്ങാം.