Posted by ”എടാ അജൂ… നാളെ നീ ഒന്ന് കോയമ്പത്തൂർ വരെ പോകണം. നമ്മുടെ പാർലറിലേക്ക് കുറച്ച് പുതിയ മിഷീനുകളും സാധനങ്ങളും വാങ്ങാനുണ്ട്. നീ പോയാൽ കാര്യങ്ങൾ പെട്ടെന്ന് നടക്കും. രണ്ട് ദിവസം കൊണ്ട് തിരിച്ചു വരാമല്ലോ.
എനിക്ക് ഈ ക്വാറന്റൈൻ ഒക്കെ കഴിഞ്ഞു വന്നതല്ലേ ഉള്ളൂ, വല്ലാത്ത ക്ഷീണം,
” ഫൈസി വളരെ കാര്യമായി തന്നെ പറഞ്ഞു.
അജു ബിരിയാണി ചവയ്ക്കുന്നത് നിർത്തി ഫൈസിയെ ഒന്ന് നോക്കി. “നാളെയാ? നടക്കില്ല ഇക്കാ… ഈ മാസം ഫുൾ ടൂർണമെന്റ് നടക്കുവാ. എനിക്ക് രാവിലെ ട്രെയിനിങ്ങും വൈകുന്നേരം മാച്ചും ഉണ്ട്. ടീമിൽ നിന്നും എനിക്ക് മാറി നിൽക്കാൻ പറ്റില്ല.”
”എടാ, അത് അത്ര അത്യാവശ്യമുള്ള കാര്യമായതുകൊണ്ടാ ഞാൻ നിന്നോട് പറയുന്നത്. കളി പിന്നെയും കളിക്കാമല്ലോ,” ഫൈസിയുടെ ശബ്ദത്തിൽ അല്പം അമർഷം കലർന്നു.
”അത് പറ്റില്ല. ക്ലബ്ബിന്റെ പ്രധാന കളിക്കാരനാ ഞാൻ. ഇക്കയ്ക്ക് പോകാൻ പറ്റില്ലെങ്കിൽ വേറെ ആരെങ്കിലും വിട്ടോ. അല്ലെങ്കിൽ ഇക്ക തന്നെ പൊക്കോ. എനിക്ക് ഇപ്പൊ ഫുട്ബോൾ ആണ് പ്രധാനം,” അജു കടുപ്പത്തിൽ തന്നെ മറുപടി നൽകി.
”നിനക്ക് വീട്ടിലെ കാര്യങ്ങളേക്കാൾ വലുതാണോടാ ഈ പന്ത് തട്ട്? ഞാൻ പറയുന്നത് നീ ഒന്ന് അനുസരിക്കില്ലേ?” ഫൈസിക്ക് ശരിക്കും ദേഷ്യം വന്നു തുടങ്ങി.
”ഇക്ക വെറുതെ ഓരോന്ന് പറഞ്ഞു ചൂടാവണ്ട. എനിക്ക് എന്റെ കാര്യങ്ങൾ അറിയാം. ഇക്ക വന്ന സ്ഥിതിക്ക് ഇക്ക തന്നെ പൊക്കോ,” അജു വിട്ടുകൊടുക്കാൻ തയ്യാറായിരുന്നില്ല.
ഭക്ഷണമേശയിൽ സഹോദരങ്ങൾ തമ്മിൽ വാക്കുകൾ കൊണ്ട് തർക്കം മുറുകി. പുറത്ത് മഴ പെയ്യാൻ തുടങ്ങുന്നതുപോലെ അന്തരീക്ഷം ഇരുണ്ടു കൂടിയിരുന്നു. മുറിക്കുള്ളിൽ ഫൈസിയുടെയും അജുവിന്റെയും തർക്കം നടക്കുമ്പോൾ, കുളി കഴിഞ്ഞ് ഈറൻ മണക്കുന്ന ശരീരവുമായി പടികൾ ഇറങ്ങി വരുന്ന ഐഷു ഇതൊന്നും അറിയുന്നുണ്ടായിരുന്നില്ല.