Posted by ‘ആൽബിൻ ഹാപ്പിയാണ് ഒരുപാട്.. പക്ഷേ താൻ എത്ര ഭംഗിയായിട്ടാണ് ഓരോ നുണയും പറയുന്നത് ?? സ്റ്റെല്ലക്ക് ഒരു തരം കുറ്റബോധം ഉള്ളിൽ തോന്നി തുടങ്ങി.
” ആൽബി… കുളിച്ചിട്ട് വാ ഞാൻ ചായ എടുത്തു വെക്കാം ”
അവൾ ഫോണും ബാഗും വാങ്ങി അൽബിയെ ബാത്റൂമിലെക്ക് പറഞ്ഞു വിട്ടു.
ആൽബി കുളി കഴിഞ്ഞു വന്നപ്പോഴേക്കും ചൂട് പാറുന്ന ചായയും അതിനൊപ്പം ബ്രഡും ജാമും അവൾ എടുത്ത് വച്ചിരുന്നു.
പതിവ് പോലെ ഓഫീസ് വിശേഷങ്ങളും കാര്യങ്ങളും ഒക്കെ ഷെയർ ചെയ്യുമ്പോൾ ചില ഭാഗങ്ങൾ അറിഞ്ഞുകൊണ്ട് കട്ട് ചെയ്തു ഒഴിവാക്കേണ്ടി വരുന്നത് അവൾക്ക് ഒരുതരം വല്ലാത്ത മാനസികാവസ്ഥ ഉണ്ടാക്കിയിരുന്നു..
വിവാഹം കഴിഞ്ഞ് ഇത്രയും വർഷത്തിനുശേഷം ആൽബിയോട് പലകാര്യങ്ങളും നുണ പറയേണ്ട അവസ്ഥ..!!
പാവം ഞാൻ പറയുന്ന എല്ലാ കാര്യങ്ങളും അവനത് പോലെ വിശ്വസിക്കുന്നു..
ചായ കുടിയും കഴിഞ്ഞ് അന്ന് പതിവ് പോലെ അവൾ നടക്കാൻ ഇറങ്ങി.
” ആൽബി നീ കൂടെ വാ നമുക്കൊരുമിച്ചു പോകാം ”
” എടി ഞാൻ ഇപ്പോൾ വന്ന് കയറിയതല്ലേ ഉള്ളൂ..! ”
” അതൊന്നും പറഞ്ഞിട്ട് കാര്യമില്ല നമുക്ക് ഒരുമിച്ച് നടക്കാൻ പോകാം വന്നെ പറ്റുള്ളൂ..!! ”
സ്റ്റെല്ലയുടെ വാശിക്ക് മുന്നിൽ അവൻ വീണു.
” എന്നാ ശരി ഇറങ്ങാം ”
ഡോർ ലോക്ക് ചെയ്ത് അവർ മൂവരും ഒരുമിച്ച് നടക്കാൻ ഇറങ്ങി.
അവൾ ആൽബിയുടെ കൈകോർത്ത് പിടിച്ച് ഇലക്ട്രോണിക് സിറ്റിയുടെ തെരുവിൽ കൂടി കുഞ്ഞിനെയും കൊണ്ട് മുന്നോട്ട് നടന്നു
അന്ന് വെള്ളിയാഴ്ചയും പിറ്റേ ദിവസം ലീവും ആയതുകൊണ്ട് പതിവിലും ലേറ്റ് ആയിട്ടാണ് അവർ തിരികെ വന്നത്.