🤾മോനൂട്ടൻ്റെ സ്വന്തം ടീച്ചർ🧕 [ചിക്കു]

അവൻ പഠിത്തം നിർത്താൻ തക്കതായ കാരണം മറ്റൊന്നായിരുന്നു . എട്ടാം ക്ലാസിൽ പഠിക്കുന്ന സമയത്ത് തൻ്റെ ജീവിതത്തിൽ നേരിട്ട ആ മഹാ ദുരന്തത്തെ പറ്റിയും തൻ്റെ അമ്മയേയും അച്ചനേയും കുറിച്ചുള്ള ഓർമകളെ പറ്റിയും ഊണിലും ഉറക്കത്തിലും ചിന്തിച്ച് ചിന്തിച്ച് ഹോർമോൺ വ്യതിയാനങ്ങൾ സംഭവിച്ച് വളർച്ച മുരടിച്ചുപോകുന്ന ഒരു പ്രത്യേക തരം അസുഖം അവൻ്റെ ശരീരത്തെ അടിമുടി മാറ്റിമറിച്ചിരുന്നു .

+ 2 വിന് അവൻ്റെ ക്ലാസിൽ കൂടെ പഠിച്ചിരുന്ന മിക്ക ആൺ കുട്ടികൾക്കും താടിയും മീശയും ഉയരവും വെച്ചു . പെൺകുട്ടികൾക്ക് പോലും മോനുവിനേക്കാൾ ഉയരമുണ്ട് . ക്ലാസിലെ ഏറ്റവും ചെറിയവൻ എന്ന മറ്റുള്ളവരുടെ പരിഹാസം സഹിക്കവയ്യാതെയാണ് അവൻ പഠിത്തം അവസാനിപ്പിച്ചത് .

തൻ്റെ പ്രായത്തിലുള്ള ആൺകുട്ടികൾ കൈലിയും ഷർട്ടുമിട്ട് സൈക്കിളിൽ ചെത്തി നടക്കുമ്പോൾ ഷർട്ടിടാതെ മുട്ടിന് മുകളിൽ നിൽക്കുന്ന നിക്കറുമിട്ട് മോനു തോട്ടിലെ വെള്ളത്തിൽ പരൽ മീനിനെ പിടിച്ച് കളിച്ച് നടന്നു . കുറച്ച് വർഷങ്ങൾ കഴിഞ്ഞ് അവന് ഇരുപത് വയസായിട്ടുകൂടിയും അതിൽ നിന്ന് യാതൊരു വിത്യാസവും അവന് വന്നതേയില്ലായിരുന്നു .

മാത്രമല്ല പൈനാപ്പിൾ തോട്ടത്തിൽ കയറി പൈനാപ്പിൾ കട്ട് പറിക്കുക , വെള്ളരിക്കണ്ടത്തിൽ കയറി മുള്ളൻ വെള്ളരിക്ക കട്ട് തിന്നുക , പാടം ഉഴുവാൻ വരുന്ന ഉഴുവലുകാർ ഊരിയിടുന്ന ഷർട്ടിൻ്റെ പോക്കറ്റിൽ നിന്നും ചില്ലറ മോഷ്ടിച്ച് പലഹാരങ്ങൾ വാങ്ങിച്ച് തിന്നുക ഇതൊക്കെയായിരുന്നു മോനുവിൻ്റെ ഹോബികൾ .

അവൻ്റെ വല്യപ്പച്ചൻ പൗലോ മാപ്ലയും വല്യമ്മച്ചി അന്നക്കുട്ടിയും പഞ്ചപാവങ്ങളായിരുന്നതിനാൽ അവർ അവൻ്റെ പ്രായത്തിന് നിരക്കാത്ത കുട്ടിത്തരങ്ങൾ പലതും കണ്ടില്ലെന്ന് നടിച്ചു . മാത്രമല്ല അവന് അച്ചനും അമ്മയും ഇല്ലല്ലോ എന്ന സിംപതിയും അതിൻ്റെ വാത്സല്യവും അവർ വേണ്ടുവോളം മോനുവിന് കൊടുത്ത് അവനെ വശളാക്കിയിരുന്നു . വല്യപ്പച്ചൻ പൗലോ മാപ്ല ടാപ്പിങ്ങിന് പോയി തിരിച്ച് വരുമ്പോൾ വല്യമ്മച്ചി അന്നക്കുട്ടിയും വല്യപ്പച്ചനൊപ്പം പാലെടുക്കാനും ഷീറ്റടിക്കാനുമായി പോകും .