🤾മോനൂട്ടൻ്റെ സ്വന്തം ടീച്ചർ🧕 [ചിക്കു]

വർക്കിച്ചൻ ഒട്ടും മടിക്കാതെ തൊണ്ടി സഹിതം മോനൂട്ടനെ അവൻ്റെ വീട്ടിലേക്ക് കൊണ്ടുപോയി കാര്യം അവതരിപ്പിച്ചു . അത് കേൾക്കേണ്ട താമസം അരിശം പൂണ്ട അന്നക്കുട്ടി കിട്ടുന്ന വടികളെല്ലാം എവിടുന്നോ പെറുക്കി എടുത്ത് അവനെ പൊതിരെ തല്ലി . ഒരു വടി ഒടിയുമ്പോൾ അടുത്തത് തപ്പിപ്പിടിച്ചെടുത്ത് അച്ചാലും മുച്ചാലും അവർ മോനുവിനെ തല്ലി പതം വരുത്തി . വർക്കിച്ചനും പൗലോ മാപ്ലയും അത് കണ്ടിട്ട് സഹിക്കാൻ കഴിയാതെ ഒരു പ്രകാരം അന്നക്കുട്ടിയെ പിടിച്ച് മാറ്റി .

മോനു വാവിട്ട് തല്ല് കൊണ്ട് ഇനി ഞാൻ ചെയ്യില്ല വല്യമ്മച്ചീ .. അപ്പച്ചാ എന്നെ തല്ലല്ലേന്ന് പറാപ്പച്ചാ എന്നും പറഞ്ഞ് ഉറക്കെ കരയാൻ തുടങ്ങി .

നിന്നെ ഞാൻ വെച്ചേക്കില്ലട… ഹും” മനുഷ്യനെ നാണം കെടുത്താൻ .. നിനക്കിവിടെ എന്തിൻ്റെ കുറവാട ഞങ്ങൾ വരുത്തുന്നത് ഹ്മ് ? ആകെ ഒരു മോളെ ഉണ്ടായിരുന്നുള്ളൂ . അവൾ അങ്ങ് പോയി . അവളുടെ മകനേ കൂടി ഇല്ലാണ്ടാക്കാൻ ഈ എനിക്കറിയാം കേട്ടോട ..എന്നും പറഞ്ഞ് ദേഷ്യം പിടിച്ചത് നിർത്താൻ കഴിയാതെ കയ്യിൽ വടി കിട്ടാഞ്ഞിട്ട് കൈ കൊണ്ട് മോനുവിനെ തല്ലാൻ വീണ്ടും അന്നക്കുട്ടി ഓങ്ങി വന്നതും …

എടി പെമ്പർന്നോത്തീ അത് ചത്ത് പോവുമെടി നിൻ്റെ കൈ വീണാൽ … നീ അങ്ങ് മാറിക്കെ .. എന്ന് പറഞ്ഞ് പൗലോമാപ്ലയും…

എൻ്റെ പൊന്ന് അന്നച്ചേടത്തി മതി അതിനെ തല്ലിയത് . അവന് ഒരു പേടി ഉണ്ടാവാനും ഇനി ആവർത്തിക്കാതിരിക്കാനും വേണ്ടിയാ ഞാൻ അവനെ കയ്യോടെ ഇങ്ങ് കൊണ്ടുവന്നത്. അല്ലാതെ നിങ്ങളെ ഈ നിസാര കാര്യത്തിന് കൊച്ചാക്കിയിട്ട് എനിക്ക് എന്ത് കിട്ടാനാ . ചേടത്തി ഇങ്ങ് മാറിക്കെ എന്ന് പറഞ്ഞ് വർക്കിച്ചനും അന്നക്കുട്ടിയെ ഒരു പ്രകാരം തടുത്ത് നിർത്തി .