Posted by ” സിദ്ധപ്പാ…. ആള് വന്നിട്ടുണ്ട്, എവിടേം തപ്പി പോകേണ്ടി വന്നില്ല.കൂട്ടത്തിൽ രണ്ടു മൂന്നെണ്ണം വേറേം ഉണ്ട്… ”
ഒറ്റ ശ്വാസത്തിൽ സിദ്ധുവിന്റെ ചെവിയിൽ പറഞ്ഞ ശേഷം ചിന്നൻ മറുപടിക്കായി കാത്തു..
” നന്നായി….!! ഇന്നലെ അവൻ എന്നെ ഉറക്കിയതല്ലേ, ഇന്ന് അവനെ ഉറക്കിയിട്ട് എനിക്ക് ഇവിടെ വന്നിട്ട് ശെരിക്കൊന്നു ഉറങ്ങണം.. അല്ലെങ്കിൽ ഈ അസ്വസ്ഥത മാറിക്കിട്ടൂല … ”
തന്റെ രണ്ടുകൈകളും ഉള്ളിൽ നോക്കികൊണ്ട്‌ സിദ്ധു പറഞ്ഞു… അവന്റെ ശബ്ദത്തിലേ ഗൗരവം ചിന്നൻ തിരിച്ചറിഞ്ഞു…
” എന്നാൽ പിന്നെ…പോയി നോക്കാം ലേ…? ”
ചിന്നൻ സിദ്ധുവിന്റെ തോളത്തു കൈവെച്ചുകൊണ്ട് ചോദിച്ചു..
സിദ്ധു തോർത്തുമുണ്ട് അയയിൽ വിരിച്ചിട്ടു, സോപ്പ് ഉള്ളിൽ കൊണ്ടുവെച്ചു റെഡിയായി വന്നു… മുണ്ടിന് പകരം ഒരു ട്രാക്ക് സ്യുട്ട് പാന്റ് ആയിരുന്നു ഇട്ടത്..
ഇറങ്ങാൻ നോക്കുമ്പോളാണ് ലക്ഷ്മിയമ്മയും റെഡിയായി വന്നത്…
” സിദ്ധു മോനെ, ഞാനും വരുന്നു, ഒന്നിച്ചു പോവാം.. ”
ധൃതിയിൽ പടിയിറങ്ങിക്കൊണ്ട് ലക്ഷ്മിയമ്മ സിദ്ധുവിനരികിൽ വന്നു അവന്റെ കൈ പിടിച്ചു..
” അല്ല….ഞങ്ങൾ സൈക്കിളിൽ…. ”
പറയാൻ വന്ന ചിന്നനോട് സിദ്ധു കണ്ണു കാണിച്ചപ്പോൾ അവൻ അതോടെ വിഴുങ്ങി..
” നീ വിട്ടോ.. ഞങ്ങൾ വരാം… അവിടെത്തന്നെ ഉണ്ടാവണം.. ”
എവിടെ ഉണ്ടാവണം എന്ന് മനസിലായ ചിന്നൻ പുഞ്ചിരിയോടെ സൈക്കിൾ ചവിട്ടി നീങ്ങി…
” മോനെ….ഇനി വഴക്കിനൊന്നും പോവല്ലെട്ടോ… ഇന്നലെ അവൾക്ക് വേണ്ടിയാണെന്ന് അറിയാം, അതിന്റെ ദേഷ്യത്തിന് ബുദ്ധിമോശമൊന്നും കാണിക്കരുത്.. ”
അവന്റെ കയ്യിൽ അമർത്തിക്കൊണ്ട് സ്നേഹപൂർവ്വം അവർ പറഞ്ഞു…
മനസ് മുഴുവൻ തിരിച്ചടി കൊടുക്കണമെന്ന ചിന്തയിൽ ആയതുകൊണ്ട് അതിനൊരു മറുപടി അവന് വായിൽ വന്നില്ല..
” വാശിയും വൈരാഗ്യവും കൊണ്ട് ഒന്നും നേടാനില്ല… കഴിഞ്ഞതൊക്കെ മറന്നേക്ക്..നമുക്ക് അറിയാത്ത ആളുകളാണ്…വേണ്ടാത്തത് എന്തെങ്കിലും സംഭവിച്ചാൽ എനിക്ക് സഹിക്കാൻ വയ്യ “