Posted by
‘ലച്ചു.. നീ വേറെ എന്തൊക്കെയോ ചിന്തിച്ചു കൂട്ടുവാ.. ഞാൻ മാച്ചിന്റെ തിരക്ക് കാരണം ആണ് നിന്റെ അടുത്ത് വരാതെ ഇരുന്നത്. ഇത് വഴി ജസ്റ്റ്‌ പോയപ്പോൾ ഇഷാനിയെ കണ്ടു ഒന്ന് സംസാരിച്ചതാ..’
അത് പറഞ്ഞു തീർന്നതും ഒരടി എന്റെ കവിളിൽ വീണു കഴിഞ്ഞിരുന്നു. സാധാരണ ലച്ചു എനിക്കിട്ട് വീക്കുന്നത് താടിയിൽ ആണ്. അതെനിക്ക് അത്ര വേദനിക്കില്ല. വേദനിക്കാൻ അല്ല അവൾ അങ്ങനെ വീക്കുന്നതും. എനിക്ക് നൊന്തില്ല എങ്കിലും ഇത് പക്ഷെ അവൾ ശരിക്കും എന്നെ തല്ലിയതാണ്.
‘ഞാൻ വന്നിരുന്നെടാ പട്ടി നിന്റെ കളി കാണാൻ…..’
ലച്ചു ഉറക്കെ രോഷത്തോടെ വിളിച്ചു പറഞ്ഞു.
‘നിനക്കൊരു സർപ്രൈസ് ആകട്ടെ എന്ന് കരുതി പറയാതെ വന്നതാണ്. ജയിച്ചു കഴിഞ്ഞു നിന്നെ കാണാൻ വന്നപ്പോളേക്കും നീ എന്തോ ധൃതിക്ക് വണ്ടി എടുത്തു പോകുന്നത് ആണ് കണ്ടത്. ഇത്രയും ദൂരം ഞാൻ നിന്റെ പിന്നിൽ ഉണ്ടായിരുന്നു. ഞാൻ പലതവണ വിളിച്ചിട്ടും നീ അതൊക്കെ ഒഴിവാക്കി. ഇവിടെ നീ അര മണിക്കൂർ നിന്റെ മറ്റവളെ നോക്കി നിന്നപ്പോൾ പോലും ഞാൻ നിന്റെ തൊട്ട് അടുത്ത് നിന്ന് നിന്നെ വിളിച്ചു. അപ്പോൾ എങ്കിലും നീ ഒന്ന് എടുക്കണേ എന്ന് പ്രാർഥിച്ചു. പക്ഷെ എന്റെ പേര് കണ്ടിട്ടും നീ ഫോൺ എടുത്തില്ല. ഇത്രയും ദൂരം നീ വണ്ടി ഓടിച്ചു വന്നത് നിന്റെ ഇഷാനിയെ കാണാൻ അല്ലേ.. കൺ കുളിർക്കേ എന്നിട്ട് എന്റെ മോൻ കണ്ടോ..? രണ്ടും എവിടെ വരെ പോകുമെന്ന് ഇതിൽ ഇരുന്ന് വാച്ച് ചെയ്യണം എന്ന് കരുതിയതാ.. പക്ഷെ എനിക്ക് പറ്റിയില്ല….’
ലച്ചു എനിക്ക് നേരെ പൊട്ടിത്തെറിച്ചു കൊണ്ട് പറഞ്ഞു. അവൾ കളി കാണാൻ വന്നിരുന്നോ…? ഇത്രയും ദൂരം എന്റെ പിന്നാലെ തന്നെ ഉണ്ടായിരുന്നോ..? ഞാൻ അതൊന്നും ശ്രദ്ധിച്ചു കൂടിയില്ല.. മനസ്സിൽ മുഴുവൻ ഇഷാനിയെ കാണാൻ ഉള്ള ആഗ്രഹം ആയിരുന്നു.
‘നിനക്ക് ഒന്നും പറയാൻ ഇല്ലേ..? പുതിയ കള്ളം ഒന്നും കിട്ടുന്നില്ലേ..?
എന്നെ കളിയാക്കി ഒരു പുച്ഛഭാവത്തിൽ അവൾ ചോദിച്ചു