Posted by നിനക്ക് ഉള്ള ചോറ് ഞാൻ അവിടെ വിളമ്പി വെച്ചിട്ടുണ്ട് കഴിച്ചിട്ട് വേഗം വാ അപ്പോയേക്കും ഞാൻ ഇതുങ്ങളെ എല്ലാം പുറത്തേക്ക് ആക്കാം… അമ്മ ഒന്നും സംഭവിക്കാത്തത് പോലെ തന്നെ പറഞ്ഞു.
ഞാൻ വേഗം പോയി ചോറ് ഉണ്ടു. എന്നിട്ട് അമ്മയുടെ അടുത്തേക്ക് തന്നെ ചെന്നു. ഞാൻ ഓടുകയായിരുന്നോ നടക്കുകയായിരുന്നോ എന്നൊന്നും എനിക്ക് അറിയില്ല… എനിക്ക് അമ്മയുടെ കൂടെ തന്നെ നിൽക്കണം എന്നെ ഉണ്ടായിരുന്നൊള്ളു.
ഞാൻ ചെന്നപ്പോൾ അമ്മ ആടുകളെയെല്ലാം കൊണ്ടുപോവാൻ റെഡിയായി നിൽക്കുന്നുണ്ട്. ഞാനും അമ്മയുടെ കൂടെ കൂടി ആടുകളെ സ്ഥിരം കൊണ്ടുപോവാറുള്ള സ്ഥലത്തേക്ക് കൊണ്ട് പോയി..
ആടുകളെ ഒക്കെ സ്വതന്ത്രമാക്കി വിട്ടിട്ട് അമ്മ ഒരു പരന്ന കല്ലിൽ പോയി ഇരുന്നു. ഞാനും അമ്മയുടെ അടുത്തേക്ക് തന്നെ പോയി. എന്നിട്ട് അമ്മയുടെ തോളോട് ചാരി ഇരുന്നു.
കുറച്ച് നേരം ഞങ്ങൾ ഒന്നും മിണ്ടിയില്ല. പിന്നെ വേണോ വേണ്ടേ എന്ന സംശയത്തോടെ ഞാൻ ചോദിച്ചു.
അച്ഛൻ എപ്പോഴാ വന്നത്..
അമ്മ ദൂരേക്ക് നോക്കിയിരുന്നിട്ട് പറഞ്ഞു.
ഞാൻ കുളി കഴിഞ്ഞ് ചെന്നപ്പോൾ അയാൾ അവിടെ ഒതുക്കിൽ ഇരിക്കുന്നുണ്ടായിരുന്നു.
“”അയാൾ. ആദ്യമായിട്ടാണ് അച്ഛനെ അമ്മ അയാൾ എന്ന് പറഞ്ഞ് ഞാൻ കേൾക്കുന്നത്. നിന്റെ അച്ഛൻ അല്ലെങ്കിൽ ദേഷ്യം വരുമ്പോൾ നിന്റെ തന്ത എന്ന് മാത്രമാണ് അമ്മ ഇത് വരെ അച്ഛനെ പറഞ്ഞിരുന്നൊള്ളു.””
മ്മ്.. ഞാൻ പതിയെ ഒന്ന് മൂളി.. ഇനി എന്ത് ചോദിക്കും എന്ന് കരുതി ഇരുന്നപ്പോൾ അമ്മ പറഞ്ഞു.
അയാൾ ഇവിടന്ന് ജോലി നോക്കട്ടെ എന്ന് പറഞ്ഞ് പോയത് ജോലി അന്വേഷിക്കാൻ അല്ല.
പിന്നെ…? ഞാൻ ചോദിച്ചു.
നമ്മളെ ഉപേക്ഷിക്കാൻ. അമ്മ പറഞ്ഞു.
ഉപേക്ഷിക്കാൻ.. എന്തിന്…?
അയാൾക്ക് വേറെ ഒരു പെണ്ണുമായി ബന്ധമുണ്ടായിരുന്നു. അവളുടെ കൂടെ ജീവിക്കാൻ ആണ് അയാൾ നമ്മളെ ഇവിടെ കൊണ്ടോന്ന് ആക്കിയത്.
അപ്പൊ അച്ഛന്റെ സ്വത്തും പണവും ഒക്കെ…
മ്മ്.. എല്ലാം ആ പെണ്ണും അവളുടെ ഭർത്താവും കൂടി അങ്ങേരെ പറ്റിച്ചതാണ്…
ഭർത്താവോ…? ഞാൻ മനസ്സിലാവാതെ അമ്മയോട് ചോദിച്ചു.
മ്മ്… അങ്ങേർക്ക് ഒരുപാട് വർഷങ്ങൾക്ക് മുന്നെ ഈ പെണ്ണുമായി ബന്ധമുണ്ടായിരുന്നു. അവൾ ചോദിക്കുമ്പോൾ പൈസയായിട്ടും സ്വര്ണമായിട്ടും ഒക്കെ അയാൾ അവൾക്ക് കൊണ്ടോയി കൊടുത്തു.