Posted by അവരുടെ ഗാങ് എന്നെ വന്നു പൊതിഞ്ഞതും എനിക്ക് മുൻപേ നടന്നിരുന്ന അച്ഛനും മഞ്ജുസിന്റെ അച്ഛനും ഒക്കെ ചിരിയോടെ എന്നെ ഒന്ന് തിരിഞ്ഞുനോക്കി . ഏറ്റവും മുന്നിൽ പോകുന്ന പെൺപട മാത്രം അതൊന്നും ശ്രദ്ധിക്കുന്നില്ല. അവര് വേറെന്തൊക്കെയോ പറഞ്ഞാണ് നടക്കുന്നത് .
റോസിമോള് അവരുടെ പാട്ടും ഡാൻസും ഒക്കെ കണ്ടു സന്തോഷിക്കുന്നുണ്ട്. അവള് അവരെ നോക്കി എന്റെ ഒക്കത്തിരുന്നു കുണുങ്ങുന്നുണ്ട് .പക്ഷെ വഴിയേ പോകുന്നവരൊക്കെ എന്നെ നോക്കി ചിരിക്കുന്നത് കണ്ടപ്പോൾ ഞാൻ വേഗം പൈസ എടുത്തുകൊടുത്തു അവരെ ഒഴിവാക്കി വിട്ടു .
അതോടെ എന്നെ ഒന്ന് ഉഴിഞ്ഞു വാങ്ങി അനുഗ്രഹിച്ച ശേഷം , റോസ്‌മോളുടെ കവിളിൽ ഒന്ന് പയ്യെ തഴുകികൊണ്ട് അവര് മടങ്ങി .അപ്പോഴേക്കും ബാക്കിയുള്ളവര് കുറച്ചു അപ്പുറം എത്തിയിരുന്നു .
“ആരെ കണ്ടാലും ചിരിച്ചോണം കേട്ടല്ലോ …”
ട്രാൻസ് ടീം കൈകൊട്ടി പോകുന്നത് നോക്കി ഇരിക്കുന്ന റോസ്‌മോളുടെ കവിളിൽ പയ്യെ കടിച്ചുകൊണ്ട് ഞാൻ കണ്ണുരുട്ടി .
“ആഹ്…ച ച്ചാ”
ഞാൻ അവളെ കടിച്ചതും റോസിമോള് പെട്ടെന്ന് ഒന്ന് ചിണുങ്ങി .പിന്നെ എന്നെ നോക്കി ആടികുഴഞ്ഞുകൊണ്ട് ചിരിച്ചു .
“അയ്യടാ ..എന്താ ചിരി..”
ഞാൻ അവളുടെ ചുണ്ടത്തു പയ്യെ ചുംബിച്ചുകൊണ്ട് അവളെ ഒന്ന് കുലുക്കി . പിന്നെ കൂടെയുള്ളവരെ ചെയ്‌സ് ചെയ്യാൻ വേണ്ടി വേഗത്തിൽ നടന്നു . അതിനിടക്ക് ഒരു പ്രായം ചെന്ന സ്ത്രീ കൂടി എന്റെ വഴി മുടക്കി . തേങ്ങയും വിഭൂതിയും പഴവും ഒക്കെയുള്ള ഒരു പൊതി വിൽക്കന്ന അമ്മയാണ് . മുരുക സന്നിധിയിൽ സമർപ്പിക്കാനുള്ള വഴിപാടു സാധനങ്ങൾ ഒക്കെ അതിൽ ഉണ്ട് .
“തമ്പി..എടുത്തുക്കൊ …അമ്പതു രൂപ മട്ടും തമ്പി ”
അവരെന്റെ വഴി തടഞ്ഞുകൊണ്ട് ചിരിച്ചു .
“വേണ്ട പാട്ടി …”
ഞാൻ അവരെ നോക്കി പുഞ്ചിരിച്ചു ആ ക്ഷണം നിരസിച്ചു . റോസിമോള് പക്ഷെ അവരെയും കൗതുകത്തോടെ നോക്കുന്നുണ്ട് . നെറ്റിയിൽ മുഴുവൻ വിഭൂതി തേച്ചു ചുളിവ് വീണ തൊലിയും എന്നാൽ വാത്സല്യവും തോന്നുന്ന മുഖവുമുള്ള ഒരു അമ്മുമ്മ ! അവരുടെ കാതിൽ ഒരു വള പോലുള്ള വലിയ കമ്മൽ തൂങ്ങുന്നുണ്ട് .
“എടുത്തുക്കൊ തമ്പി…അഭിഷേകത്തുക്ക് താനേ..എടുത്തുക്കൊ ”
അവര് പിന്നെയും എന്റെ കൂടെ കൂടികൊണ്ട് നിർബന്ധിച്ചു .
“അമ്പതു രൂപ ഇല്ല ..ആകെ മുപ്പതേ ഉള്ളു പാട്ടി ”