കുറ്റബോധം 16 [Ajeesh] [Climax]

സജീഷ് പുറത്തേക്ക് പോവാൻ ഒരുങ്ങി…
” ഇനിയിപ്പോ എങ്ങോട്ടാ… ”
രേഷ്മ തിടുക്കത്തോടെ ചോദിച്ചു…
” കുറച്ചു പണികൂടി ബാക്കി ഉണ്ട് മോളെ… ”
ഞാൻ വേഗം വരാം.. ”
സജീഷ് പുറത്തേക്ക് ഇറങ്ങി പോയി…
രേഷ്മ അകത്തേക്ക് ചെന്നു…
അമ്മയുടെ കമ്മൽ കൊള്ളാം…
സ്വർണ്ണ ജിമിക്കി…
വലുപ്പം കുറവാണ്… എങ്കിലും നല്ല അഴകുണ്ട് അതിന്…
” അമ്മേ…”
അവൾ ഉറക്കെ വിളിച്ചു…
മറുപടിയായി യാതൊന്നും കേട്ടില്ല…
അവൾ അമ്മയുടെ മുറിക്കകത്തേക്ക് കയറി…
” ഇവിടെ ഇരിക്കാല്ലേ…”
അമ്മേ… ഞാൻ വെറുതെ പൊക്കിയടിക്കാൻ പറയാണ് എന്ന് കരുതരുത്… ”
” ഈ കമ്മൽ ഇടുമ്പോ എന്താ ഒരു ഐശ്വര്യം അമ്മക്ക്… ”
‘അമ്മ തുറന്നിട്ട ജനലിലൂടെ പുറത്തേക്ക് നോക്കി നിൽക്കുകയാണ്…
അമ്മയുടെ ദൃഷ്ടി പോയ ദിക്കിലേക്ക് അവളും നോക്കി…
ഒന്നുമില്ല…
വെറും ശൂന്യത…
” അമ്മ എന്താ ഈ ആലോചിക്കുന്നെ…. ”
ആ നെറ്റിത്തടത്തിൽ നിന്ന് വിയർപ്പ് പൊടിയുന്നത് നോക്കി രേഷ്മ ചോദിച്ചു…
പെട്ടന്ന് അടുത്ത വീട്ടിലെ പട്ടി ഉച്ചത്തിൽ കുരക്കാൻ തുടങ്ങി…
ഈ വഴിയിലുള്ള ഏത് വീട്ടിൽ ആര് വന്നാലും ആ പട്ടി കുരക്കുക പതിവാണ്…
” ഞാൻ ഒന്ന് നോക്കിയിട്ട് വരാം..
ആരോ വന്നിട്ടുണ്ട് എന്ന് തോന്നുന്നു… ”
രേഷ്മ തിരികെ നടന്നു…
” മോളെ …
നീ ഇവിടെ ഇരിക്ക്… ”
അമ്മയുടെ ശബ്ദം വിറക്കാൻ തുടങ്ങി…
രേഷ്മ ഓടിച്ചെന്ന് അമ്മയുടെ അടുത്തായി ഇരുന്നു…
” എന്താ അമ്മേ ….??
നല്ല സുഖല്ല്യേ?? ”
വിയർക്കുന്നുണ്ടല്ലോ…. ”
അവൾ അമ്മയുടെ മുഖത്തെ വിയർപ്പ് കണങ്ങൾ തുടച്ചു …
അവർ രേഷ്മയുടെ തോളിലൂടെ കൈ ഇട്ട് തന്നിലേക്ക് ചേർത്ത് പിടിച്ചു…
വല്ലാത്ത ഒരു ബലം ആ കൈകൾക്ക് ഉണ്ടായിരുന്നു
” അമ്മക്ക് പോവാറായി മോളെ… ”
ദേ അമ്മയെ കൊണ്ടുവാൻ
ഒരു കുട്ടി വന്ന് നിൽക്കുന്നുണ്ട് പുറത്ത്…”
രേഷ്മയുടെ നെഞ്ചിൽ എന്തോ വന്ന് വീണ പ്രതീതി ഉണ്ടായി…
പട്ടി വീണ്ടും ഉച്ചത്തിൽ കുരച്ചു…
” ഞാൻ ഏട്ടനെ വിളിക്കാം… ”
അവൾ എണീക്കാൻ ശ്രമിച്ചച്ചതും ” അമ്മ നെഞ്ചിൽ കൈ വച്ച് അമർത്തി… ”
കട്ടിലിലേക്ക് മലച്ചു വീണു…