Posted by ദേവുഎന്റെ നെഞ്ചിൽ പറ്റി ചേർന്നിരുന്നു കൊണ്ട് തന്നെ അതു പറഞ്ഞു…. എന്റെ ഉള്ളമഭിമാനത്താൽ പുളകം കൊണ്ടു.
” പക്ഷെ അതു കൊണ്ടൊന്നും അല്ലട്ടോ ഞാൻ നിങ്ങളെ സ്നേഹിച്ചത്…. ”
പെട്ടന്ന് കുസൃതി നിറഞ്ഞ ദേവുവിന്റെ ശബ്ദം ഉയർന്നു.
” പിന്നെ? ”
” അതൊന്നും പറയില്ല…. സീക്രെട് ആണ്…. ”
വീണ്ടും കുസൃതിയോടെ അവൾ പറഞ്ഞു
” കളിക്കാതെ പറ പെണ്ണെ… ”
” പിന്നൊരിക്കെ പറയാം നന്ദുവേട്ട . എനിക്ക് നാണമാ….. ”
ദേവു അതും പറഞ്ഞെന്റെ നെഞ്ചിലേക്ക് മുഖം പൂഴ്ത്തി. പിന്നെ ഞാനൊന്നും ചോദിക്കാൻ പോയില്ല… ഈ ഒരു ജന്മം മുഴുവനും ഉണ്ട് ചോദിക്കാനും പറയാനുമായി ഞങ്ങൾക്ക് ബാക്കിയായി… ദേവു അറിയേണ്ടതും അവൾക്കു പറയേണ്ടതുമായ കാര്യങ്ങളിനിയും പലതാണ്. എല്ലാം വഴിയേ മനസിലാക്കാം എന്ന് തീരുമാനിച്ചു…..
ദേവുവിനെ അങ്ങനെ നെഞ്ചോടു ചേർത്തു പിടിക്കുമ്പോൾ ഈ ലോകത്തെ ഏറ്റവും ഭാഗ്യവാനായതും സന്തോഷവാനും ആയ ഏക വ്യക്തി ഞാനെന്നു തോന്നി പോകും. വല്ലാത്ത ഒരു സുഖം.പറഞ്ഞറിയിക്കാൻ ആവാത്ത ഒരു അനുഭൂതി. കടുത്ത ചൂടിന്റെ കാഠിന്യത്തിനിടയിലും ഒരു ഇളം കാറ്റിനു പോലും നമുക്ക് തരാൻ കഴിയുന്ന ഒരു കുളിരിന്റെ അതെ അനുഭൂതി ഞാൻ ഇവിടെയും അനുഭവിച്ചറിഞ്ഞു….
” നന്ദുവേട്ടന് കോളേജിൽ ഒത്തിരി കൂട്ടുകാരുണ്ടോ? ”
ദേവുവിന്റെ സംശയങ്ങൾക്കും സംസാരത്തിനും അറുതി ഇല്ലായിരുന്നു. കുറെ നാളുകൾക്കു ശേഷം ആദ്യമായി മനസ്സ് തുറന്നു എന്നോട് സംസാരിക്കൻ ഒരവസരം കിട്ടിയ സന്തോഷത്തിൽ ആണവൾ.