Posted by അങ്ങനെ പുറത്തു പോയി അത്യാവശ്യം വേണ്ട ചില ഐറ്റംസ് ഒകെ വാങ്ങി ഞാൻ തിരിച്ചെത്തി . മഞ്ജുസിനു കഴിക്കാൻ തൽക്കാലത്തിനു ബണ്ണും ജാമും വാങ്ങി . പിന്നെ കഞ്ഞി ഉണ്ടാക്കാനായി പൊടിയരിയും വാങ്ങി . അതുണ്ടാക്കാൻ അറിയില്ലേലും ഞാൻ അമ്മയെ ഫോണിൽ വിളിച്ചു പുള്ളിക്കാരിയുടെ നിർദേശങ്ങൾ അനുസരിച്ചു ഉണ്ടാക്കി നോക്കി എന്നത് വേറെ കാര്യം .
എല്ലാം വാങ്ങി തിരികെ വരുമ്പോഴും മഞ്ജുസിനു എന്നെ വലിയ വിശ്വാസം ഉണ്ടായിരുന്നില്ല . അത് മനസിലാക്കികൊണ്ട് തന്നെ ഞാൻ കവറിൽ നിന്ന് ബണ്ണും ജാമും എടുത്തു ബെഡിലേക്കിട്ടു .അത് വായുവിൽ പറന്നുകൊണ്ട് മഞ്ജുസ് ഇരിക്കുന്നതിന്റെ അടുത്ത് ചെന്ന് വീണു .
“ഇതെന്താ ഇത് ?”
മഞ്ജുസ് അതിലേക്ക് നോക്കി കണ്ണ് മിഴിച്ചു .
“എന്നെകൊണ്ട് ഇത്രേ പറ്റൂ..സാധാരണ പനി പിടിച്ചാൽ ബ്രെഡോ , ബന്നോ , റസ്‌ക്കോ ഒക്കെ ആണല്ലോ പതിവ്..സൊ ഇത് വെച്ച് അഡ്ജസ്റ്റ് ചെയ്യ് മോളൂസേ ”
ഞാൻ ഗൗരവത്തിൽ പറഞ്ഞു .
“എനിക്ക് വേണ്ട ഇതൊന്നും…”
മഞ്ജുസ് അതിലേക്ക് അറപ്പോടെ നോക്കി മുഖം ചുളിച്ചു .
“പിന്നെ നിനക്കു ഞാൻ ചിക്കെൻ ബിരിയാണി ഉണ്ടാക്കി തരാം. വേണേൽ അതെടുത്ത് തിന്നോ , ഞാൻ പോയിട്ട് എനിക്ക് എന്തേലും ഉണ്ടാക്കട്ടെ..”
ഞാൻ അവളെ നോക്കി കണ്ണിറുക്കി പറഞ്ഞു .
“കവി..എനിക്കിതൊന്നും വേണ്ടാട്ടോ..”
അവളെ മൈൻഡ് ചെയ്യാതെ ഞാൻ അടുക്കള ലക്ഷ്യമാക്കി നീങ്ങുന്നത് കണ്ടു മഞ്ജുസ് ദേഷ്യത്തോടെ പറഞ്ഞു .
“വേണ്ടെങ്കി തിന്നണ്ട ..എടുത്തു കളഞ്ഞേക്ക്..”
ഞാൻ ചിരിയോടെ പറഞ്ഞു അകത്തേക്ക് കടന്നു .
പിന്നെയാണ് അമ്മയെ വിളിച്ചു കഞ്ഞി ഉണ്ടാക്കുന്ന സെറ്റപ്പ് ചോദിച്ചറിഞ്ഞത് . ഏറെക്കുറെ സംഭവം വിജയിച്ചു എന്ന് വേണം പറയാൻ . കിച്ചണിലെ ഗ്യാസ് സ്ടവ്വിൽ വെച്ചായിരുന്നു പരീക്ഷണം മൊത്തം . ഒടുക്കം നല്ല ചൂട് പൊടിയരി കഞ്ഞി ഒരു പാത്രത്തിലേക്ക് പകർത്തി അതിലേക്ക് ഒരു സ്പൂണും ഇട്ടു ഞാൻ റൂമിലേക്ക് കടന്നുചെന്നു .ആ സമയം വരെയും മഞ്ജുസ് ആ പരിസരത്തേക്ക് വന്നു നോക്കിയിട്ടില്ല.
പക്ഷെ ഞാൻ ചെല്ലുമ്പോൾ കാണുന്നത് ഗതി കേട്ടാൽ പുലി പുല്ലും തിന്നും എന്ന കാഴ്ച ആണ് . ഒന്ന് ഭേദം വെച്ചപ്പോൾ ടി.വി ഓൺ ചെയ്തിട്ട് ജാമിന്റെ കുപ്പി തുറന്നു വെച്ച് ബണ്ണിൽ മിക്സ് ചെയ്തു കഴിക്കുന്ന മഞ്ജുസിനെ ആണ് ഞാനവിടെ കണ്ടത് .
“ആഹ…വേണ്ടെന്നു പറഞ്ഞ സാധനം നന്നായി കുത്തികേറ്റുന്നുണ്ടല്ലൊ? ”
അവളുടെ കഴിപ്പ് കണ്ടു ഞാൻ ചിരിയോടെ ചോദിച്ചു . രണ്ടു കയ്യും കഞ്ഞി നിറച്ച ചില്ലു പാത്രത്തിൽ ചേർത്ത് പിടിച്ചു റൂമിലേക്ക് വരുന്ന എന്നെ അപ്പോഴാണ് മഞ്ജുസ് ഒന്ന് മൈൻഡ് ചെയ്യുന്നത് .