Posted by കുട്ടൻ കാണിച്ചിടത്തേക്ക് തിരിഞ്ഞപ്പോൾ ഫോണിൽ ആരേയോ വിളിച്ചിട്ട് കിട്ടാതെ ടെൻഷനായി ഒരു കയ്യിൽ ഫോണും ഒരു കുറിപ്പുമായി അവൾ ഫാർമസി കൗണ്ടറിലേക്ക് വന്നു.. ചീട്ടു വാങ്ങി കമ്പ്യൂട്ടറിൽ നോക്കീട്ട്..
“ചേച്ചി.. 2200രൂപ ആകോട്ടാ “
“മോളെ.. ചേട്ടൻ ഇപ്പോൾ വരും എന്നിട്ട് പൈസ അടച്ചാൽ മതിയോ “
“അയ്യോ അത് പറ്റൂല ചേച്ചി.. ഈ മരുന്ന് അത്യാവശ്യമുള്ളതാട്ടോ “
എന്ത് ചെയ്യണമെന്നറിയാതെ നഖം കടിച്ചും ഫോണിൽ വീണ്ടും ആരേയോ വിളിക്കാൻ ശ്രമിച്ചും അവളവിടെ നിന്നു..
” ചേച്ചി ഒന്നുകിൽ പൈസ തന്നിട്ട് മരുന്ന് കൊണ്ടോയി കൊടുക്ക്.. അല്ലെങ്കിൽ ഡോക്‌ടറോട് പറഞ്ഞാൽ വേറെ വെല്ലോടത്തേക്കും ചീട്ട് തരും.. ഇങ്ങനെ നിന്ന് സമയം കളയല്ലേ ചേച്ചി “
“എത്രയാ “
“ങേ “
സക്കീർ ഫാർമസിയിലേക്ക് ചെന്നു ചോദിച്ചപ്പോൾ പെട്ടന്ന് അവിടെ ഇരുന്ന പെണ്ണിന് കാര്യം മനസ്സിലായില്ല..
“ഇവരുടെ ബിൽ എത്രയാണെന്ന് “
രാധയെ കാണിച്ചിട്ട് ചോദിച്ചപ്പോൾ ആ കൊച്ചിന് കാര്യം മനസ്സിലായി.. അപ്പോളും രാധ ഒന്നും മനസ്സിലാകാതെ അയാളെയും നോക്കി നിന്നു… സക്കീർ മരുന്നും വാങ്ങി
” കൊച്ചെവിടെയാ “
“അവിടെ… icu യിൽ “
രാധ അത്ഭുതം മാറാതെ അയാളെ തന്നെ നോക്കീട്ട് അയാൾക്കൊപ്പം icu വിലേക്ക് നടന്നു.. പിറകേ കുട്ടനും… അവനു കാര്യങ്ങൾ മനസ്സിലായി..
Icu വിന്റെ ഡോറിൽ തട്ടിയപ്പോൾ ഒരു നേഴ്സ് പുറത്തേക്ക് വന്നു. സക്കീർ മരുന്നവർക്ക് കൊടുത്തപ്പോൾ..
“ആർക്കാ “
“ദേവൂന് .. ദേവികക്ക് “
രാധ പെട്ടന്ന് കേറി പറഞ്ഞു, സക്കീർ തിരഞ്ഞവളെ നോക്കിയപ്പോൾ രാധ പെട്ടന്ന് മുഖം താഴ്ത്തി.. നേഴ്സ് മരുന്നുമായി അകത്തേക്ക് പോയപ്പോൾ രാധ മൊബൈൽ എടുത്ത് സക്കീറിനെ കാണിച്ചിട്ട്..
“ഹസ്ബെന്റിനെ വിളിച്ചിട്ട് കിട്ടുന്നില്ല…ഏട്ടൻ വരുമ്പോൾ പൈസ വാങ്ങി തരാട്ടോ “
“അത് കുഴപ്പൂല… മോളിങ് വന്നേ പറയട്ടെ “
സക്കീർ അവളുടെ ചുമലിൽ കൈ വെച്ച് തിരിഞ്ഞു നടന്നു.. കൂടെ കാര്യമറിയാതെ രാധയും..
“ഡാ… എവിടേയും പോകരുത്.. അവിടെത്തന്നെ വേണം. എന്തേലും വേണമെങ്കിൽ വാങ്ങി കൊടുക്ക് “
തിരിഞ്ഞു കുട്ടനോട് പറഞ്ഞിട്ട് അവനെ ഒന്ന് കണ്ണടച്ചു കാണിച്ചോണ്ടും രാധയുമായി പുറത്തേക്ക് നടന്നു..
“ചേട്ടാ ഒരുപാട് നന്ദിയുണ്ട്.. ആ പൈസ തന്നതിന്.. ഹസ്ബന്റ്‌ വന്നാൽ അവിടെ നിൽക്കുന്ന ആളുടെ കയ്യിൽ പൈസ കൊടുത്തേക്കാം.. അല്ലെങ്കിൽ ചേട്ടന്റെ നമ്പർ തന്നാൽ വിളിക്കാൻ പറയാം “