Posted by “സോ .. ഇത്രയേ ഉള്ളൂ തന്റെ കണ്ടെത്തൽ “
അക്ഷമയോടെ എസ്പി ചോദിച്ചു
“അല്ല സാർ .. അനൂപ് കൊല്ലാൻ ഉപയോഗിച്ച കത്തി , ആ കത്തിയിൽ അനൂപിന്റെ വിരലടയാളം ഇതെല്ലാം കണ്ടെത്തിയിട്ടുണ്ട് “
“ഹാ.. ഇതൊന്നും ഒരു തെളിവ് അല്ലെടോ .. നല്ല ഒരു വക്കീലിനെ വച്ച് വാദിച്ചാൽ സുഖമായി ഊരിപ്പോകാൻ കഴിയും “
“സാർ .. ഞാൻ “
മറുപടി പറയുവാൻ കഴിയാതെ അശോക് കുഴങ്ങി.
“ലോക്കൽ പോലീസിന് ഈ കേസ് കൊടുക്കണ്ട എന്ന് ഡിജിപി ആദ്യമേ പറഞ്ഞതാണ് .. എന്റെ ഒരാളുടെ നിർബന്ധത്തിനു വഴങ്ങിയാണ് ഈ കേസ് തന്നെ ഏൽപ്പിച്ചത് “
തൊട്ടു മുൻപിലെ ഫ്ലാസ്ക്കിൽ നിന്നും കപ്പിലേക്ക് ചായ പകർന്നു കൊണ്ട് എസ്പി പറഞ്ഞു.
“യൂ നീഡ് ടീ .. ?”
“നോ സാർ . താങ്ക്സ് “
“സോ .. ഇന്ന് കാലത്ത് റിപ്പോർട്ട് ചെയ്ത ഒരു കേസ് ഉണ്ട് , തന്റെ സർക്കിളിന് കീഴിലാണ് .. ശശി എന്നൊരു കഞ്ചാവ് വിൽപ്പനക്കാരൻ കൊല്ലപ്പെട്ടിരിക്കുന്നു .. ബോഡി കണ്ടെത്തിയത് കല്ലടയാറിന്റെ തീരത്ത് ഒരു ഓട്ടോറിക്ഷയ്ക്ക് ഉള്ളിലാണ് , എന്റെ നിർദ്ദേശ പ്രകാരം സ്ഥലം എസ് ഐ ജോണി എഫ്ഐആർ തയ്യാറാക്കിയിട്ടുണ്ട് .. താൻ ഇനി കുറച്ചു നാൾ ഈ കേസിന്റെ പുറകിൽ വിട്ടോളൂ “
അല്പം ചായ സിപ്പ് എടുത്തു കൊണ്ട് എസ്പി പറഞ്ഞു.
“സാർ .. അപ്പോൾ വണ്ടൻമേട് കൊലപാതകം “
“ഹാ .. വണ്ടൻമേട് കൊലപാതക റിപ്പോർട്ട് താൻ സമർപ്പിച്ചു കഴിഞ്ഞല്ലോ .. ഞാനിത് മുകളിലേക്ക് ഒന്ന് കൊടുത്തു നോക്കട്ടെ .. കൊല്ലപ്പെട്ട നെൽസൺ എന്ന് പറയുന്ന ആൾക്ക് മക്കൾ ഒന്നുമില്ല ഭാര്യ മാത്രമേ ഉള്ളൂ .. സോ ഒരു പുനരന്വേഷണത്തിന് സാധ്യത കാണുന്നില്ല .. നല്ലൊരു വക്കീലിനെ വച്ച് അനൂപിന്റെ വീട്ടുകാർ കേസ് വാദിച്ച് അവനെ ഊരി കൊണ്ട് പോകുന്നെങ്കിൽ പോകട്ടെ ..”
“ഓക്കേ സാർ .. “
കസേരയിൽ നിന്നും എഴുന്നേറ്റ് നടു നിവർത്തി ഒരു സല്യൂട്ട് നൽകുമ്പോൾ തന്റെ വലതു കാലിന്റെ ബൂട്ടിന്റെ അടിയിൽ , തൊട്ടു മുൻപിൽ ഇരിക്കുന്ന എസ്പിയുടെ മുഖം ഉണ്ടായിരുന്നെങ്കിൽ എന്ന് അശോക് ആഗ്രഹിച്ചു പോയി.
“എസ് ഐ ജോണിയെ കണ്ടു അന്വേഷണ റിപ്പോർട്ട് മേടിക്കുവാൻ മറക്കണ്ട പറ്റിയാൽ ഇന്നു തന്നെ അന്വേഷണം തുടങ്ങിക്കോളൂ “