Posted by എങ്കിലും ഷൈനിച്ചേച്ചി പോയതിന്റെ വിഷമം അവളുടെ മനസിനെ മഥിക്കുന്നുണ്ടായിരുന്നു. ഷൈനി ഭര്‍ത്താവുമായി ഉള്ള പിണക്കം ഒക്കെ മാറി അവസാനം തിരികെ പോകാന്‍ സമ്മതിക്കുകയായിരുന്നു. രണ്ടുപേരും തമ്മില്‍ വളരെ അടുത്തു പോയതുകൊണ്ട് ഐഷയ്ക്ക് നല്ല വിഷമം ഉണ്ടായിരുന്നു അവള്‍ പോയതില്‍. ഷൈനി സ്വന്തം സഹോദരിയെപ്പോലെ കണ്ടിരുന്ന ഐഷയെ കെട്ടിപ്പിടിച്ചു കരഞ്ഞ ശേഷമാണ്‌ വണ്ടിയില്‍ കയറിയത്. അവളും ഗള്‍ഫിലേക്ക് വരണം എന്ന് അവള്‍ പറയുകയും ചെയ്തിരുന്നു എങ്കിലും അതിനുള്ള യോഗമൊന്നും തനിക്കില്ല എന്ന് ഐഷ ദുഖത്തോടെ ഓര്‍ത്തു. തനിച്ചായപ്പോള്‍ അവള്‍ ചെന്ന് കുറെ നേരം വെറുതെ കിടന്നു. ഷൈനിയുടെ കൂടെ ചിലവഴിച്ച ദിവസങ്ങള്‍ അവളുടെ മനസിലൂടെ കടന്നുപോയി. ചേച്ചി നല്ലൊരു കൂട്ടുകാരിയാണ്‌. എന്തും മനസ് തുറന്നു തനിക്ക് സംസാരിക്കാം. എന്തായാലും ഫോണ്‍ നമ്പരുകള്‍ കൈമാറിയത് കൊണ്ട് ഇടയ്ക്കൊക്കെ വിളിച്ചു സംസാരിക്കാന്‍ സാധിക്കും എന്നൊരു ആശ്വാസം അവള്‍ക്ക് ഉണ്ടായിരുന്നു. അങ്ങനെ ഓരോന്നും ആലോചിച്ചു കിടന്നപ്പോള്‍ ആണ് ഫോണടിച്ചത്. ഐഷ ചെന്ന് ഫോണെടുത്തു.
“ഹലോ”
“ഹാവൂ..വേറെ ആരും ഫോണെടുക്കല്ലേ എന്ന് പ്രാര്‍ഥിച്ചു കൊണ്ടാണ് ഞാന്‍ വിളിച്ചത്. ഉദ്ദേശിച്ച ആളെത്തന്നെ ലൈനില്‍ കിട്ടിയല്ലോ” മറുഭാഗത്ത് നിന്നും പരിചയമുള്ള ഒരു സ്വരം കേട്ടപ്പോള്‍ ഐഷ ആരാകും എന്ന് ആലോചിച്ചു.
“ആരാ..” അവള്‍ ആലോചനയോടെ ചോദിച്ചു.
“മറന്നു അല്ലെ..ഞാന്‍ മലേഷ്യ..”
“ഓ..ഇപ്പോള്‍ ഓര്‍മ്മ വന്നു” ഐഷയുടെ കണ്ണുകള്‍ വിടര്‍ന്നു.
“സുഖമല്ലേ? കുറെ നാളായി വിളിക്കണം എന്ന് കരുതുന്നു..ഞാന്‍ ഇവിടെ നിന്നും യു എസിലേക്ക് പോകുകയാണ്. പിന്നെ വിളിയൊക്കെ നടക്കുമോ എന്നറിയില്ല”
“അതെന്താ അവിടെ ഫോണില്ലേ? എന്നാലും ഇത്ര തവണ വിളിച്ചിട്ടും പേരൊന്നു പറഞ്ഞില്ലല്ലോ” ഐഷ ചെറിയ പരിഭവത്തോടെ പറഞ്ഞു.
“പേരില്‍ എന്തിരിക്കുന്നു മോളെ..നീയും എന്നോട് പേര് പറഞ്ഞിട്ടില്ലല്ലോ”
“ഞാനൊരു പെണ്ണല്ലേ..”
“പക്ഷെ നീ ഒരു മണ്ടിയും കൂടി ആണ്”
“അതെന്താ..”
“എടി പെണ്ണെ നിന്റെ വീട്ടിലെ ലാന്‍ഡ്‌ ലൈനിലേക്ക് ഞാന്‍ അബദ്ധത്തില്‍ വിളിച്ചപ്പോള്‍ ആണ് നമ്മള്‍ തമ്മില്‍ ആദ്യം സംസാരിച്ചത്. നിന്റെ ശബ്ദം പോലെ മനോഹരമായ ഒരു സ്ത്രീശബ്ദം ഞാനെന്റെ ജീവിതത്തില്‍ കേട്ടിട്ടില്ലാത്തത് കൊണ്ട് സംസാരം കുറെ നീട്ടി. അത് നിനക്കും ഇഷ്ടമായി എന്ന് മനസിലായത് കൊണ്ടാണ് വീണ്ടും പല തവണ ഞാന്‍ വിളിച്ചത്..”
“അതുകൊണ്ട് ഞാനെങ്ങനെ മണ്ടി ആകും”