ഡിറ്റക്ടീവ് അരുൺ 8
Detective Part 8 | Author : Yaser | Previous Part
കഥയിലേക്ക് കടക്കും മുമ്പ് രണ്ടു വാക്ക്. കഥ ഒരു പാട് ലേറ്റ് ആയി എന്നറിയാം. ഇതിന്റെ മുൻ ഭാഗത്തേക്കാൾ കൂടുതൽ ഈ ഭാഗം മികച്ചതാക്കാൻ ഞാൻ ശ്രമിച്ചിട്ടുണ്ട്. എത്രത്തോളം വിജയിച്ചിട്ടുണ്ടെന്നറിയില്ല.
നിങ്ങൾ ഓരോരുത്തരുടെയും അഭിപ്രായങ്ങളും നിർദ്ദേശങ്ങളുമാണ് ഇവിടെയുള്ള ഓരോ എഴുത്തുകാരന്റെയും പ്രതിഫലം. പ്ലീസ് സപ്പോർട്ട്.
എഴുതുന്നതിന്റെയും വായിക്കുന്നതിന്റെയും പത്തിലൊന്ന് സമയം പോലും വേണ്ടല്ലോ ഒരു നിർദ്ദേശം, അല്ലെങ്കിൽ അഭിപ്രായം പറയാൻ പ്രതീക്ഷയോടെ അടുത്തഭാഗം നിങ്ങൾക്ക് മുന്നിൽ സമർപ്പിക്കുന്നു.
രാവിലെ മുതലുള്ള യാത്രയുടെ ക്ഷീണത്താൽ ഇന്ന് നേരത്തെ കിടന്നുറങ്ങാമെന്ന ചിന്തയോടെയാണ് അരുൺ വീട്ടിലെത്തിയത്. നന്ദന്റെ അന്വേഷണത്തിന്റെ പുരോഗതിയും അവന് ആശ്വാസം തോന്നുന്നതായിരുന്നു. അത് കൊണ്ട് തന്നെ അവൻ ഒമ്പത് മണിയോടെ ഉറങ്ങാൻ തുടങ്ങി.
ഉറക്കം മുറുകി വന്ന സമയത്താണ് അരുണിന്റെ ഫോൺ ബെല്ലടിച്ചത്. അവൻ വേഗം ഫോണെടുത്ത് നമ്പർ നോക്കി. നന്ദനാകുമോ എന്നായിരുന്നു അവൻ സംശയിച്ചത്. പക്ഷേ സിസ്പ്ലേയിൽ തെളിഞ്ഞ് കണ്ടത് Vipin clt calling എന്നാണ്.
അരുണിന് ആളെ മനസ്സിലായി. അച്ഛന്റെ മരണ ശേഷം മൂത്ത സഹോദരന്റെ സ്ഥാനത്ത് നിന്ന് കൊണ്ട് തന്നെ സംരക്ഷിച്ച ജേഷ്ഠ തുല്യൻ. എന്തായിരിക്കും ഈ നേരത്ത് അവന് പറയാനുള്ളതെന്ന ചിന്തയോടെയാണ് അരുൺ ആ കോൾ അറ്റന്റ് ചെയ്തത്.
“ഹലോ വിപിൻ.”
“ഹലോ അരുൺ. ഞാനൊരു പ്രശ്നത്തിൽ പെട്ടിരിക്കുകയാണ്. നീ എത്രയും പെട്ടന്ന് ഇവിടെ വരെ വരണം.” ക്ഷീണിച്ച സ്വരത്തോടെ വിപിൻ പറഞ്ഞു.
“നീയെന്താടാ വിപിനേ ഈ പറയുന്നത്.? ഈ രാത്രി ഞാനെങ്ങനെ അവിടെ വരെ വരാനാ.?” നിസ്സഹായതയോടെ ആയിരുന്നു അരുണിന്റെ ചോദ്യം.
“അരുൺ എന്നെ ആരോ തട്ടിക്കൊണ്ട് വന്നിരിക്കുകയാണ്. പണമോ മറ്റ് വില പിടിപ്പുള്ളതോ അല്ല അവർക്ക് വേണ്ടത്. നീ വന്നെങ്കിൽ മാത്രമേ എന്നെ വിടൂ എന്നാണവർ പറയുന്നത്.” നേർത്ത തേങ്ങലോടെയാണ് വിപിൻ പറയുന്നതെന്ന് അരുൺ തിരിച്ചറിഞ്ഞു.
“നീ വിഷമിക്കേണ്ട വിപിൻ. ഞാനുടൻ തന്നെ ഇവിടെ നിന്ന് പുറപ്പെടാം. എത്രയും പെട്ടന്ന് തന്നെ അവിടെ എത്താൻ ശ്രമിക്കുകയും ചെയ്യാം.” അരുൺ കൂടുതലൊന്നും ആലോചിക്കാതെ മറുപടി നൽകി.